10:51, 30 - قاڭتار 2016 | GMT +5
الاشتىڭ اياۋلى ازاماتتارى ءۇشىن تىلەكشىمىن - نۇرلان ءالىمجان
استانا. قازاقپارات - «نۇر وتان» ساياسي پارتياسىنىڭ كەزەكتەن تىس XVII سەزىندە بەكىتىلگەن ءماجىلىس دەپۋتاتتىعىنا ۇمىتكەرلەردىڭ پارتيالىق تىزىمىندەگى ءانشى، اكتەر نۇرلان ءالىمجان تىزىمدەگى الاشتىڭ اياۋلى ازاماتتارى ءۇشىن تىلەكشىمىن دەيدى.
«پارتيالىق تىزىمگە ەنۋىم - مەن ءۇشىن جاڭا بەلەس. ەگەر دە ءوتىپ دەپۋتاتتىققا ءوتىپ جاتسام، ەلباسىمىزدىڭ ۇلكەن جوسپارلارىن قازاقتىڭ ءبىر ازاماتى رەتىندە جۇزەگە اسىرۋعا ايانباي تەر توگەمىن دەگەن سەنىمدەمىن. الدىن الا ەشتەڭە جوسپارلامايمىن، ويتكەنى، بۇل - سايلاۋ. ءالى ەشكىم ەشقايدا وتكەن جوق. سوندىقتان، ءتىزىمنىڭ ىشىندە بولعانىما دا قۋانىشتىمىن» ، - دەيدى ن. ءالىمجان.
سونداي- اق ءارتىس: «زامانداستارىمنىڭ اراسىنان گەننادي، يليا، سەرىك دەپۋتاتتىققا وتسە، قازاقتىڭ سپورتىن اسپانداتار ەدى» ، - دەيدى.
«ولار - قازاق سپورتىن اسپانداتپاسا، كەم تۇسىرمەيتىن ازاماتتار. جالپى، تىزىمدە الاشتىڭ تالاي اياۋلىلارى بار. بارىنە تىلەكشىمىن. كىم بولسا دا، دەپۋتات بولعان سوڭ ەل ءۇشىن ءادىل ەڭبەك ەتۋى كەرەك» ، - دەدى ن. ءالىمجان.
اۆتور: كەنجەكەي توقتامۇرات قىزى
