ەكسپو- عا وراي ا ق ش-تىڭ ءىرى كولىك كومپانياسى استانادا قىزمەت كورسەتۋگە قىزىعۋشىلىق تانىتادى

بۇل تۋرالى كەشە «اتامەكەن» ۇلتتىق كاسىپكەرلەر پالاتاسىندا امەريكالىق ءىرى كولىك كومپانياسىمەن ىنتىماقتاستىق ماسەلەلەرىن تالقىلاۋ بارىسىندا ءمالىم بولدى.

ايتا كەتەيىك، «اتامەكەن» پالاتاسى دوڭگەلەك ۇستەل ۇيىمداستىرىپ، وعان استانالىق اۋەجاي، ۆوكزالدارىندا قىزمەت كورسەتەتىن تاكسي-كومپانيالارى، «Astana Innovation»  كومپانياسىنىڭ وكىلدەرى قاتىسقان بولاتىن. شارا اياسىندا قاتىسۋشىلار ىقتيمال ينۆەستور سانالاتىن امەريكالىق «Carmel» جانە «Elizarov Consulting Group» كومپانيالارىنىڭ وكىلدەرىمەن كەزدەستى.

«Carmel» كومپانياسى ا ق ش قالالارىنا كەلەتىن تۋريستەر ءۇشىن سەرۆيستىك قىزمەتتەر كورسەتەدى. ولار قىزمەتتەردىڭ تولىق پاكەتىن، تاكسيدەن باستاپ، كەز كەلگەن نىسانداردى، ورىنداردى ارالاۋعا دەيىنگى قىزمەتتەر ۇسىنادى. وسىنىڭ ءبارى ونلاين-رەجيمدە قاداعالانىپ، جۇزەگە اسادى. كومپانيانىڭ الەمدە 180 نەن استام وكىلدىكتەرى بار»، - دەدى «اتامەكەن» ۇ ك پ باسقارما ءتوراعاسىىڭ ورىنباسارى نۇرجان التايەۆ.

ونىڭ ايتۋىنشا، امەريكالىق كومپانيالار «ەكسپو-2017» كورمەسىنە وراي، استاناعا ۇلكەن قىزىعۋشىلىق تانىتىپ وتىر. «حالىقارالىق كورمە اياسىندا استاناعا كەلۋشىلەر 5 ميلليون ادامدى قۇرايدى.

سوندىقتان دا، ءبىز دامىعان ەلدەردىڭ وسى باعىتتاعى قىزمەتتەرىمەن تىعىز بايلانىس ورناتۋىمىز كەرەك. سونىمەن قاتار، بەدەلدى كومپانيانىڭ قازاقستانعا ينۆەستيتسيا سالىپ، جەرگىلىكتى بيزنەسپەن بىرگە جۇمىس ىستەۋگە قىزىعۋشىلىق تانىتۋى وتە جاقسى نىشان. سوندىقتان دا، ءبىز ءار تاراپتان وكىلدەر شاقىرىپ بۇگىنگى باسقوسۋدى ۇيىمداستىرىپ وتىرمىز»، - دەيدى نۇرجان التايەۆ.

ونىڭ سوزىنە قاراعاندا، امەريكالىق كومپانيا قازاقستانعا العاش رەت تانىسۋ نيەتىندە ساپارلاپ وتىر. «ولار قازىرگى تاڭدا ءبىزدىڭ نارىقتى تۇتاستاي زەرتتەپ كورمەكشى. سوسىن ءبىز ولاردان ناقتى ينۆەستيتسيالىق ۇسىنىستار كۇتەتىن بولامىز»، - دەدى ول.

اۆتور: قانات مامەتقازى ۇلى