قازاق حاندىعىنىڭ مەرەكەسى حالىقتىڭ بەرەكەسى بولدى - جامبىل وبلىسى جۇرتشىلىق وكىلدەرى
استانا. قازاقپارات - ەلباسى نۇرسۇلتان نازاربايەۆتىڭ اتىنا جامبىل وبلىسى جۇرتشىلىق وكىلدەرىنەن حات كەلدى، دەپ حابارلايدى اقوردانىڭ باسپا ءسوز قىزمەتىنەن.
اۆتورلار حاتتا بىلتىرعى جىلدىڭ ەل ومىرىندە ايشىقتى وقيعالارعا تولى بولعانىن ايتادى. سونىڭ ىشىندە مەملەكەتتىلىگىمىزدىڭ نەگىزى - قازاق حاندىعىنىڭ 550 جىلدىعىن مەرەكەلەۋدىڭ ايرىقشا ورنى بار ەكەنىن اتاپ وتكەن.
«ءسىزدىڭ شەشىمىڭىزبەن استانادا باستالعان مەرەكە جالعاسىن تاۋىپ، قازاق حاندىعىنىڭ تۋى كوتەرىلگەن جامبىل جەرىندە زور تابىسپەن ءوتتى. حاندىقتىڭ مەرەكەسى حالىقتىڭ بەرەكەسى بولدى»، - دەلىنگەن حاتتا.
جۇرتشىلىق وكىلدەرى مەرەكەلىك شارالار اياسىندا اشىلعان جاڭا نىساندار تاراز شاھارىنىڭ كوركىن ەسەلەپ، ەلدىڭ رۋحىن كوتەرە تۇسكەنىنە، جاستاردىڭ تاريحي ساناسىن جاڭعىرتقانىنا نازار اۋدارعان.
سوڭىندا اۆتورلار بولاشاق ۇرپاق ءۇشىن بارلىق جاعداي جاسالىپ جاتقانى ءۇشىن مەملەكەت باسشىسىنا العىس ايتىپ، ەلباسىعا مىقتى دەنساۋلىق پەن تابىس تىلەگەن.
