ۇلى دالا قۇندىلىقتارىن ۇلىقتاۋ - ۇلتىمىزدىڭ بولاشاعىن باياندى ەتە تۇسەدى - سادىبەك تۇگەل

وعان الماتى قالاسى اكىمدىگىنىڭ وكىلدەرى، اقىن- جازۋشىلار، اۋعان سوعىسىنىڭ ارداگەرلەرى، جەلتوقسان وقيعاسىنا قاتىسۋشىلار، قوعامدىق ۇيىمداردىڭ وكىلدەرى جانە باسقا دا مۇددەلى تۇلعالار قاتىستى.

«بۇگىنگى جيىننىڭ باستى ماقساتى - ەلباسى نۇرسۇلتان نازاربايەۆتىڭ ۇلى دالا ەلى تۋرالى ايتقان ۇلاعاتتى باستامالارىنا قولداۋ كورسەتۋ، ولاردى حالىققا، اسىرەسە جاستاردىڭ ساناسىنا جەتكىزۋ، ءتۇسىندىرۋ. ۇلى دالانىڭ تاجىريبەسى، قۇندىلىقتارى ارقىلى جاستاردى وتانسۇيگىشتىككە، ەرلىككە، باتىلدىققا تاربيەلەۋدىڭ جولدارىن ىزدەۋ. مىنا جاھاندانۋ زامانىندا ۇلتتىق سايكەستىكتى ساقتاۋ وزەكتى ماسەلە بولىپ وتىر. ال وعان توسقاۋىل بولا الاتىن كۇش - ول ۇلى دالا قۇندىلىقتارىن جاڭعىرتىپ، دامىتۋ. ولاردى ۇرپاعىمىزدىڭ بويىنا ءسىڭىرۋ. ول قانداي قۇندىلىقتار؟ ول ۇرپاقتان ۇرپاققا، اتادان بالاعا كەلە جاتقان ۇلتتىق سالت- داستۇرلەرىمىز، مادەنيەتىمىز، سونداي- اق شىنشىلدىق، ادىلدىك، باۋىرمالدىق، پاكتىك، ۇجداندىلىق سەكىلدى اسىل قاسيەتتەرىمىز. سولاردى پاش ەتىپ، وزىمىزگە قورعان ەتسەك، رۋحانياتىمىزعا جات جۇنيەلەر - جەمقورلىق، جەزوكشەلىك، قىزتەكەلىك، ماسكۇنەمدىك، ناشاقورلىق سەكىلدى كەسەلدەردەن ارىلا الامىز. ويتكەنى، 2500 جىلدىق تاريحى بار ۇلى دالادا ونداي ازعىندىقتار بولماعان. ۇلى دالا ەلىندە شىنشىلدىق، تۋراشىلدىق، ادىلدىك بولعان. ۇلى دالا ەلى «باس كەسپەك بولسا دا ءتىل كەسپەك جوق»، «اۋرۋىن جاسىرعان ولەدى»، «تۋرا بيدە تۋعان جوق» دەگەن سەكىلدى قاعيدالارمەن ءومىر سۇرگەن. سوندىقتان، ۇلى دالا قۇندىلىقتارىن ۇلاعاتتاۋ - ۇلتىمىزدىڭ بولاشاعىن باياندى ەتە تۇسەدى»، - دەدى ءوز سوزىندە قازاقستاننىڭ ەڭبەك سىڭىرگەن قايراتكەرى، «ۇلى دالا قىراندارى» رەسپۋبليكالىق الەۋمەتتىك- مادەني قوزعالىسىنىڭ تەڭ ءتوراعاسى سادىبەك تۇگەل.

 سونىمەن قاتار، ول الداعى ۋاقىتتا وسى تاقىرىپتا ەلىمىزدىڭ باسقا دا وڭىرلەرىندە مادەني ءىس- شارالار، دوڭگەلەك ۇستەلدەر، پاتريوتتىق شەرۋلەر، جارىستار وتەتىندىگىن ايتتى.

ايتا كەتەلىك، ق ر تاۋەلسىزدىگىنىڭ 25 جىلدىعىنا، جەلتوقسان كوتەرىلىسىنىڭ 30 جىلدىعىنا، الماتى قالاسىنىڭ 1000 جىلدىعىنا، «ۇلى كوشتىڭ» 25 جىلدىعىنا جانە «ۇلى دالا قىراندارى» رەسپۋبليكالىق قوعامدىق مادەني- الەۋمەتتىك قوزعالىسىنىڭ 5 جىلدىعىنا ارنالعان بۇگىنگى جيىندا ۇلتتىق قۇندىلىقتارىمىزدى ۇلىقتاۋ، ولاردى پاش ەتۋ، جاستاردى ۇلتتىق رۋحتا تاربيەلەۋ ماسەلەلەرى بويىنشا باياندامالار وقىلىپ، قىزۋ تالقىلاندى.

شارا سوڭىندا ۇلى دالا ەلى ۇلتتىق باستاماسى اياسىندا ۇندەۋ قابىلداندى.

اۆتور: جاپپاربەرگەن ايبوتا