جاسىل تەحنولوگيا: قازاقستاندىقتار اراسىندا جاڭعىرتىلاتىن قۋات كوزدەرى تانىمال بولا باستادى - ن . جيەنبايەۆ

الماتىنىڭ جوعارى جاعىندا ورنالاسقان بۇل تۇرعىن ءۇي، شاتىرىندا ورناتىلعان كۇن باتارەياسى ارقىلى ەلەكتر قۋاتىمەن قامتاماسىز ەتىلەدى. ودان باسقا، بۇل ءۇي ارنايى تەحنولوگيا بويىنشا اعاشتان سالىنعان جانە ونى جىلىتۋعا كوپ ەنەرگيا جۇمسالمايدى. قىستىڭ كۇندەرى ءۇي 1-2 گرادۋسقا عانا سالقىندايدى ەكەن. ءۇي ىشىندەگى بارلىق تۇرمىستىق تەحنيكالار كۇن ەنەرگياسى ارقىلى جۇمىس ىستەيدى.  

 «كۇندىزگى ۋاقىتتا ۇيدەگى بارلىق جۇيە 15 كۆت/ساعات قۋات وندىرەدى، ال ەلەكتر توعىن وڭدەگىشتەردىڭ قۋاتى 9 ك ۆ ت. قۇرايدى. ۇيدە بارلىق ەلەكتر قۇرالدارى - توڭازىتقىش، گاز قازاندىعى جانە باسقا دا تەحنيكالار جۇمىس ىستەپ جاتسا، ۇيگە ءارى كەتسە 2 ك ۆ ت/ساعات ەلەكتر قۋاتى جۇمسالادى. بۇل جاعدايدا ءۇش ەنەرگيا تۇرلەندىرگىشتىڭ تەك بىرەۋى عانا جۇمىس ىستەيدى. ول 100 ۆولت تۇراقتى توق جانە 230 ۆولت اۋىسپالى توقتى وڭدەيدى. مىسالى، كىر جۋعىش ماشينا دا ەلەكتر جەلىسىنە قوسىلعان جاعدايدا، قالعان ەكى تۇرلەندىرگىش تە ىسكە قوسىلادى. ويتكەنى، ولارعا تۇسەتىن سالماق ۇلعايا تۇسەدى»، - دەدى وسى ءۇيدىڭ يەسى،  «ND&Co»  ج ش س جەتەكشىسى نۇرلان جيەنبايەۆ.   

ول سونداي- اق، ارتىق ەنەرگيانى جيناۋعا گەلي اككۋمۋلياتورى قولدانىلاتىندىعىن جەتكىزدى.   

«ولار ەكولوگيالىق جاعىنان تازا جانە اۋاعا زياندى زاتتار شىعارمايدى. بۇل، اككۋملياتورلاردىڭ جاڭا ءتۇرى. ولاردىڭ قولدانىلۋ مەرزىمى ون ەسەگە ۇلعايتىلعان. بۇل جۇيە ا ق ش- تا جاسالعان جانە الەمدەگى ەڭ ۇزدىك جۇيە بولىپ سانالادى»، - دەدى ول.  

سونداي- اق، ن. جيەنبايەۆ بۇل ءۇيدىڭ قالالىق ەنەرگيا جەلىلەرىنە تاۋەلدى ەمەستىگىن جانە قوسالقى ستانسالاردا اپات ورىن الىپ، كورشىلەردە جارىق سونگەن جاعدايدا ولارعا كومەكتەسىپ تۇراتىندىعىن ايتتى.

 ايتا كەتەلىك، ول ەكولوگيالىق جاعىنان تازا، ەنەرگەتيكالىق تيىمدىلىگى جوعارى ءۇي سالىپ، ونى قولدانىپ جاتقانى ءۇشىن  U.S. GREEN BUILDING  كومپانياسى ساراپشىلارىنىڭ پلاتينالىق LEED   سەرتيفيكاتىنا يە بولعان العاشقى قازاقستاندىق ازامات.

«تاۋ بوكتەرلەرىنە كۇننىڭ كوزى جاقسى تۇسەدى، ءبىراق مۇندا ەلەكتر سىمدارىن تارتۋ قىمبات تۇرادى عوي. سوندىقتان كۇن باتارەيالارى - تاپتىرمايتىن ەنەرگيا كوزى. ارينە، بۇل جۇيەنى ساتىپ الىپ ورناتۋدان كورى، دايىن ەنەرگەتيكا جەلىلەرىنە جالعانعان الدەقايدا ارزانىراق بولار ەدى. ءبىراق، بۇل جۇيە ءوزىن تولىق وتەيدى. الماتىدا مۇنداي ۇيلەر قازىر تانىمال بولا تۇسكەن. دەگەنمەن، شىنىن ايتۋ كەرەك، مۇنداي جابدىقتار قىمبات تۇرادى. ويتكەنى ولار شەتەلدە وندىرىلەدى. ول ازداي، وعان كەدەندىك باج سالىعى سالىنادى. قازاقستان دۇنيەجۇزىلىك ساۋدا ۇيىمىنا ەندى. ەندى جاعداي جاقسى جاعىنا وزگەرەتىن شىعار دەگەن ۇمىتتەمىن»، - دەدى جوبا اۆتورى.

ونىڭ ايتۋىنشا، بۇل ءۇيدىڭ ورناتىلىپ، پايدالانۋعا بەرىلگەنىنە ءتورت جىل بولعان. وسى جىلدار ىشىندە وراسان كوپ وتىن ۇنەمدەلگەن.   

«داعدارىس ەنەرگەتيكا سالاسىندا دا جاڭا مۇمكىندىكتەردىڭ اشىلۋىنا سەبەپ بولىپ جاتىر. قازاقستاندا جاڭعىرتىلمالى قۋات كوزدەرىنىڭ بولاشاعى زور. ارينە، بۇل جۇيەدە ەنەرگيا تەك كۇندىزگى ۋاقىتتا عانا وندىرىلەدى. سوندىقتان، ەنەرگيا ساقتاۋ - وزەكتى ماسەلەگە اينالعان. بۇل باعىتتا قازىر جاپوندىق ماماندار بەلسەندى جۇمىس اتقارىپ جاتىر.   ولار ۇلكەن اككۋمۋلياتورلىق ستانسانى جاساپ شىعاردى. بۇل ستانسا ءبىر كىشىگىرىم ەلدى مەكەندى ەلەكتر قۋاتىمەن قامتاماسىز ەتە الادى. مۇنداي تەحنولوگيالار، اسىرەسە الەۋمەتتىك نىسانداردا قوسىمشا قۋات كوزىنە اينالا الار ەدى. قازىرگى تاڭدا قازاقستاندا دا، ءبىزدىڭ كومپانيادا دا وسى باعىتتا زەرتتەۋ جۇمىستارى جۇرگىزىلىپ جاتىر. ءبىرقاتار جاڭا ازىرلەنىمدەر ارنايى تەستەردە وڭ ناتيجە بەرۋدە. سوندىقتان، زەرتتەۋ جۇمىستارى ودان ءارى جالعاسا بەرەتىن بولادى»، - دەدى ن. جيەنبايەۆ. 

 اۆتور :   جاپپاربەرگەن ايبوتا