جازاسىن وتەپ جاتقان ازاماتتار ءۇشىن ارنايى الەۋمەتتىك قىزمەت كورسەتۋ ستاندارتتارى ەنگىزىلەدى - ەلباسى
بۇل جايىندا اقوردا جاريا ەتكەن مەملەكەت باسشىسى نۇرسۇلتان نازاربايەۆتىڭ «ۇلت جوسپارى - قازاقستاندىق ارمانعا باستايتىن جول» اتتى ماقالاسىندا ايتىلعان.
«سوت جۇيەسىنىڭ تاۋەلسىزدىگىن نىعايتاتىن شارالاردىڭ ماڭىزى ەرەكشە. مەنىڭ تاپسىرمام بويىنشا بۇگىندە قۇرمەتتى زەينەتكە شىققان سۋديالاردى زەينەتاقىلىق قامتاماسىز ەتۋ بويىنشا بارلىق ماسەلەلەرىن شەشۋدى قاراستىراتىن زاڭ قابىلدانعانى بەلگىلى. بۇل سۋديالارعا بار كۇش- جىگەرىن سوت تورەلىگىن بارىنشا وبەكتيۆتى اتقارۋعا اۋدارۋ مۇمكىندىگىن بەرەدى.
بۇدان بولەك، بىزگە بارلىق قۇقىق قورعاۋ ورگاندارىنىڭ جانە بارىنەن بۇرىن پوليتسيانىڭ ادامداردىڭ مۇددەسى مەن قۇقىقتىق ءتارتىپتى نىعايتۋ قىزمەتىندە تۇرۋىنا قول جەتكىزۋىمىز قاجەت. بۇل ءۇشىن جەرگىلىكتى بيلىك ورگاندارى مەن جەرگىلىكتى قوعامداستىقتارعا ەسەپ بەرەتىن جەرگىلىكتى پوليتسيا قىزمەتى قۇرىلادى. وسىنداي قىزمەت تۇتاستاي ەكونوميكالىق ىنتىماقتاستىق جانە دامۋ ۇيىمىنا مۇشە ءبىرقاتار ەلدەردە ءوزىن جاقسى تانىتتى»، - دەيدى پرەزيدەنت.
ەلباسى جەرگىلىكتى پوليتسيا قىزمەتىنىڭ قاراۋىنا قوعامدىق ءتارتىپ كۇزەتى، تۇرمىستىق قىلمىسقا قارسى تۇرۋ، جول قاۋىپسىزدىگىن قامتاماسىز ەتۋ مەن ۇساق قۇقىق بۇزۋشىلىقتارعا اتىمەن توزبەۋشىلىك ماسەلەلەرى بەرىلىپ وتىرعانىن ايتا كەلە، «وسى جاڭالىقتار جاڭا زاڭنامادا كورىنىس تاپقان. وندا، سونداي- اق، ازاماتتاردىڭ ەتيكالىق نورمالاردى بۇزعان پوليتسيالاردىڭ ۇستىنەن تۇسىرگەن ارىز- شاعىمدارىن قارايتىن قوعامدىق كەڭەستەر مەن وزگە دە كونسۋلتاتيۆتىك- كەڭەستىك ورگاندار جۇيەسىن قۇرۋ قاراستىرىلعان»، - دەيدى.
سونداي- اق، «قىلمىستىق قۇقىق بۇزۋشىلىق كارتاسى» ينتەرنەت- پورتالى قۇرىلاتىن بولادى. مۇنداي تەتىك الەمنىڭ ءبىرقاتار ەلدەرىندە تابىستى قولدانىلىپ كەلەدى. وسى ۆەب- رەسۋرسقا ەلدەگى بارلىق قىلمىستىق قۇقىق بۇزۋشىلىقتار جەدەل ەنگىزىلەدى. بۇل جۇرتشىلىقتىڭ قۇقىق قورعاۋ ورگاندارى جۇمىسىنىڭ تيىمدىلىگىن باقىلاۋىنا مۇمكىندىك بەرەدى.
پەنيتەنتسيارلىق جۇيەنى جاقسارتۋ كوكەيكەستى ماسەلە بولىپ تابىلادى. بۇل جۇمىس مەملەكەتتىك- جەكەمەنشىك ارىپتەستىگىن دامىتۋ شەڭبەرىندە جۇرگىزىلۋى ءتيىس.
«شەتەلدەردىڭ تابىستى تاجىريبەلەرى جەكە سەكتوردى پەنيتەنتسيارلىق مەكەمەلەردى سالۋ مەن پايدالانۋعا تارتۋ جونىندەگى شارالاردى جۇزەگە اسىرۋدىڭ نەگىزى بولۋى ءتيىس. سونداي- اق، بۇعان دەيىن زاڭنان اتتاپ، سونىسى ءۇشىن جازاسىن وتەگەن ادامدارعا كومەك كورسەتۋ مەن ىقپال ەتۋ ماڭىزدى. بۇل ءۇشىن الەۋمەتتىك وڭالتۋ كەشەندى دامىتىلىپ، جازاسىن وتەپ جاتقان ازاماتتار ءۇشىن ارنايى الەۋمەتتىك قىزمەت كورسەتۋ ستاندارتتارى ەنگىزىلەتىن بولادى. تۇتاستاي العاندا، قازاقستاندا قۇقىقتىق مەملەكەتتىڭ ورنىقتىرىلۋى - ءبىرتۇتاس جاڭعىرتۋ ۇدەرىسى اياسىندا شەشىلىپ جاتقان ءبىزدىڭ كونستيتۋتسيالىق مىندەتىمىز. بەلگىلەنگەن شارالار مەن قادامداردى جۇزەگە اسىرۋ ازاماتتاردىڭ، سونداي- اق، شەتەل ينۆەستورلارىنىڭ ۇلتتىق سوت جانە قۇقىق قورعاۋ جۇيەسىنە سەنىمىن ارتتىرىپ، تۇتاستاي العاندا، ەلىمىزدەگى بيزنەس- احۋالدى جاقسارتادى»، - دەپ اتاپ وتىلگەن پرەزيدەنت ماقالاسىندا.
اۆتور: رۋسلان عابباسوۆ
