سوت زالدارىنداعى بەينە جازبالاردى توقتاتۋعا نەمەسە رەداكسيالاۋعا مۇمكىندىك بەرىلمەيدى
بۇل جايىندا اقوردا جاريا ەتكەن مەملەكەت باسشىسى نۇرسۇلتان نازاربايەۆتىڭ «ۇلت جوسپارى - قازاقستاندىق ارمانعا باستايتىن جول» اتتى ماقالاسىندا ايتىلعان.
«ەكىنشى رەفورمانىڭ ءمانى تاۋەلسىز سوت تورەلىگى مەن قازاقستاننىڭ بۇكىل قۇقىق قورعاۋ جۇيەسىنىڭ تەك قانا ازاماتتاردىڭ قۇقىقتارى مەن بوستاندىقتارىن قامتاماسىز ەتۋگە، زاڭداردى قاتاڭ ورىنداۋعا جانە قۇقىق ءتارتىبىن نىعايتۋعا باعىتتالۋى تيىستىگىندە. ونى زاڭنامالىق تۇرعىدان قامتاماسىز ەتۋ اياسىندا جاڭا ازاماتتىق ءىس جۇرگىزۋ كودەكسى مەن جاڭا «جوعارى سوت كەڭەسى تۋرالى» زاڭ قابىلداندى.
«سوت جۇيەسى جانە سۋديالاردىڭ مارتەبەسى تۋرالى» كونستيتۋتسيالىق زاڭعا، قىلمىستىق- ءىس جۇرگىزۋ كودەكسىنە جانە اكىمشىلىك قۇقىق بۇزۋشىلىق تۋرالى كودەكسكە قاجەتتى وزگەرىستەر ەنگىزىلدى. بارىنەن بۇرىن، جاڭارتىلعان زاڭنامالار قوعامنىڭ سوت جۇيەسىنە سەنىمىن ارتتىرۋعا ىقپال ەتەتىن بولادى. ادىلدىك ناق سوتتا سالتانات قۇراتىنى بەلگىلى. قازاقستان سوتتارىن رەفورمالاۋداعى تەمىرقازىق ماسەلە - ساپالى سۋديالار كورپۋسىن جاساقتاۋ»، - دەيدى پرەزيدەنت.
ەلباسى سۋديالىققا كانديداتتاردى ىرىكتەۋدىڭ قاتاڭ تەتىگى مەن ولارعا قويىلاتىن جوعارى بىلىكتىلىك تالاپتارى زاڭ تۇرعىسىنان قاراستىرىلعانىن ايتا كەلە، سوت تورەلىگىن ۇلكەن ومىرلىك تاجىريبەسى بار جانە جوعارى مورالدىق ۇستانىمدارعا يە ەڭ لايىقتى ءارى بارىنشا دايىندالعان كاسىبي شەبەرلەر جۇزەگە اسىرۋلارى ءتيىس ەكەنىن اتاپ ءوتتى.
سۋديالاردى ىرىكتەۋ مەن تاعايىنداۋ ۇدەرىستەرى قوعام ءۇشىن ءمولدىر جانە اشىق بولادى. وسىمەن بايلانىستى ءوزىنىڭ اپپاراتى بار، قۇرامى مەن وكىلەتتىلىگى كەڭەيتىلگەن اۆتونومدى مەملەكەتتىك مەكەمەگە اينالاتىن جوعارى سوت كەڭەسى تۇبەگەيلى رەفورمالاندى.
«سوت رەفورماسىنىڭ ماڭىزدى قىرى - سوت تورەلىگىنىڭ بەس ساتىلى جۇيەسىنەن ءۇش بۋىندى جۇيەسىنە ءوتۋ. تەك ءبىرىنشى، اپەللياتسيالىق جانە كاسساتسيالىق ينستانتسيالار قالادى. بۇل جەردە كوپ ءىس قارالاتىن ءبىرىنشى جانە اپەللياتسيالىق ينستانتسيالار سوتتارىنىڭ رولدەرى ايتارلىقتاي كۇشەيتىلەتىن بولادى. مۇنداي قادام سوتتىق اۋرە- سارساڭنىڭ الدىن الىپ، سوت شەشىمىن قابىلداۋدىڭ مەرزىمىن قىسقارتادى. قازاقستانداعى سوت تورەلىگى ازاماتتاردىڭ جەكە ءومىرىنىڭ قۇپيالىعىنا كەپىل قۇقىن ەسەپكە الا كەلگەندە بارىنشا اشىق بولا تۇسەدى. سوت زالدارى سوت ىستەرىن اۋديو جانە ۆيدەوجازۋدىڭ اپپاراتۋرالارىمەن جاراقتاندىرىلادى جانە جازبالاردى قانداي دا ءبىر توقتاتۋعا نەمەسە رەداكسيالاۋعا مۇمكىندىك بەرىلمەيدى. بۇل سۋديالاردى جانە سوت ماجىلىسىنە باسقا دا قاتىسۋشىلاردى تارتىپكە شاقىرادى، سوت پروتسەسى مەن سوت قابىلداعان شەشىمنىڭ وبەكتيۆتىلىگىن قامتاماسىز ەتەدى»، - دەپ اتاپ وتىلگەن مەملەكەت باسشىسىنىڭ ماقالاسىندا.
اۆتور: رۋسلان عابباسوۆ
