مەملەكەت باسشىسى: جاڭا جىل بارشامىزدى قاشاندا جاڭا جەتىستىككە، جاڭا بيىككە جەتەلەيدى
قۇرمەتتى وتانداستار!
ساناۋلى ساتتەردەن سوڭ ءبىز جاڭا - 2016 -جىلعا قادام باسامىز!
جاڭا جىل - ءبارىمىز اق پەيىلمەن اسىعا كۇتەتىن ايرىقشا مەرەكە. «وتكەن جىلعا وكپە جوق، جاڭا جىلدان ءۇمىت كوپ» دەيدى حالقىمىز. تاريح قويناۋىنا اتتانعالى تۇرعان جىل ەلىمىز ءۇشىن جەمىستى بولدى. قازاقستان داعدارىسقا قاراماستان، ءوزىنىڭ قۇتتى قادامىن جالعاستىردى.
بيىل ءبىز تاريحى تەرەڭدە جاتقان تامىرلى حالىق ەكەنىمىزدى بارشاعا ايگىلەدىك. ۇلى دالادا ۇلت اتاۋىمەن مەملەكەت قۇرعان بابالار رۋحىنا تاعزىم ەتتىك. جاڭا قازاقستاننىڭ قالىپتاسۋىنا نەگىز قالاعان اتا زاڭىمىزدى ۇلىقتادىق. باق- بەرەكەمىزدىڭ ۇيىتقىسى - قازاقستان حالقى اسسامبلەياسىنىڭ بەدەلىن بيىكتەتتىك. ارداگەرلەرىمىزدى ارداقتاپ، ۇلى جەڭىستىڭ ءمان- ماڭىزىن ۇرپاقتىڭ ساناسىنا سىڭىردىك. قازاقتىڭ ءۇشىنشى عارىشكەرى كوك جۇزىنە سامعاپ، مەرەيىمىزدى ءوسىردى. ساۋدامىز ساپالى، تاۋارىمىز تارتىمدى بولۋى ءۇشىن دۇنيەجۇزىلىك ساۋدا ۇيىمىنا مۇشە بولدىق. بيىلعى پرەزيدەنت سايلاۋىندا بىرلىگى بار ەل ەكەنىمىزدى تاعى دا دالەلدەدىك.
ارداقتى اعايىن!
جاڭا جىل بارشامىزدى قاشاندا جاڭا جەتىستىككە، جاڭا بيىككە جەتەلەيدى. ەلىمىز كەلەر جىلى تاۋەلسىزدىكتىڭ 25 جىلدىق بەلەسىنە شىعادى. شيرەك عاسىرلىق شەجىرەمىز ءبىزدى مەرەيلى مەملەكەت رەتىندە الەمگە تانىتتى. باعىتىمىزدى بەلگىلەگەن ۇلت جوسپارى ۇلاعاتتى جولعا باستاپ كەلەدى. الداعى مەشىن جىلىندا دا ابىرويىمىز اسقاق بولادى دەپ سەنەمىن!
جاڭا جىل ءاربىر شاڭىراققا باقىت، شاتتىق، تابىس اكەلسىن! ەلىمىزدىڭ ىرىس- نەسىبەسى مولىنان بولىپ، تاتۋلىعى ارتا بەرسىن!
جاڭا جىل قۇتتى بولسىن!
