ءبىز ىزدەگەن كۇيەۋ بالا

استانا. قازاقپارات - ەرتەدە ءبىر قالانىڭ پاك ءارى ءادىل قازىسى جالعىز قىزىن يماندى بىرەۋگە تۇرمىسقا بەرمەك بولادى.

قىزىن تالاي بايلار ايتتىرادى، ءبىراق ولار قازىنىڭ كوڭىلىنەن شىعا قويمايدى. ءبىر كۇنى قازى دەم الۋ ءۇشىن باۋ-باقشاسىنا بارىپ جايعاسادى. باقشا كۇتۋشىسىنە ءجۇزىم اكەلۋىن وتىنەدى. ول ءبىر شوق ءجۇزىمدى جۋىپ، قازىعا ۇسىنادى. قازى ءجۇزىمدى اۋزىنا سالا بەرە، ارتىنان ىلە- شالا جەرگە تۇكىرىپ تاستايدى دا:

- نەگە ءجۇزىمنىڭ ءتاتتىسىن الىپ كەلمەگەنسىڭ؟ - دەپ سۇرايدى. سوندا باعبان:

- قايسى ءجۇزىمدى اكەل دەسەڭىز، سونى اكەلەيىن، ال ولاردىڭ قايسىسى ءتاتتى ەكەنىن بىلمەيمىن.

قازى تاڭعالىپ:

- ەكى جىلدان بەرى جۇزىمدەردى ءوسىرىپ، باپتاپ كەلەسىڭ. ونىڭ ءدامىن ءالى كۇنگە قالاي اجىراتا الماي ءجۇرسىڭ؟

- ءسىز مەنى جۇمىسقا الاردا جۇزىمدەردى كۇتەسىڭ دەگەن ەدىڭىز. ال ءدامىن تاتىپ تۇر دەپ ايتقان جوقسىز. سوندىقتان وسى ۋاقىتقا دەيىن ءبىر ءجۇزىمدى دە اۋزىما سالىپ كورگەن ەمەسپىن، - دەپتى.

تاڭقالعان قازى ايەلىمەن اقىلداسىپ:

- ءبىز ىزدەپ جۇرگەن كۇيەۋ بالا الىستا ەمەس، ءدال ءبىزدىڭ شاڭىراعىمىزدىڭ استىندا ەكەن. قىزىمىزدى وسى جىگىتكە بەرەيىك، - دەپ، قىزدارىن ادال باعبانعا تۇرمىسقا بەرەدى.