بۇل جىل تاريحي جادىنى جاڭعىرتۋ، جالپى ۇلتتىق بىرلىكتى نىعايتۋ رۋحىندا ءوتتى - ن. نازاربايەۆ

 استانا. قازاقپارات - بۇگىن ق ر پارلامەنتى پالاتالارى دەپۋتاتتارىنىڭ جانە سەنات پەن ءماجىلىس اپپاراتىنىڭ قىزمەتكەرلەرىنىڭ قاتىسۋىمەن وتكەن وتىرىستا ەلباسى نۇرسۇلتان نازاربايەۆتىڭ بۇكىل دەپۋتاتتىق كورپۋسقا، سەنات پەن ءماجىلىس اپپاراتتارىنىڭ قىزمەتكەرلەرىنە جاڭاجىلدىق قۇتتىقتاۋى جاريا ەتىلدى.

جيىندى اشقان ءماجىلىس ءتوراعاسى قابيبوللا جاقىپوۆ ق ر پرەزيدەنتى، ەلباسى نۇرسۇلتان نازاربايەۆ جاڭا جىل مەرەكەسىنە وراي، پارلامەنت دەپۋتاتتارىنا جانە سەنات پەن ءماجىلىس اپپاراتىنىڭ قىزمەتكەرلەرىنە ارنايى قۇتىقتاۋ جولداعانىن ايتا كەلە، ونى جاريا ەتۋ ءۇشىن ءسوزدى سەنات ءتوراعاسى قاسىم- جومارت توقايەۆقا بەردى.

«قازاقستان رەسپۋبيلكاسىنىڭ پارلامەنتىنە! قۇرمەتتى دەپۋتاتتار، قۇرمەتتى پارلامەنت سەناتىنىڭ جانە ءماجىلىسىنىڭ اپپارات قىزمەتكەرلەرى! ءوتىپ بارا جاتقان جىلى قازاقستان ۇدەمەلى دامۋ جولىمەن باتىل ىلگەرىلەي ءتۇستى. پرەزيدەنت سايلاۋى ءوتىپ، ول قوعامىمىزدىڭ تۇتاستىعىن، ەلدى تولايىم جاڭعىرتۋ ءۇشىن تاڭداپ العان باعىتىمىزدىڭ دۇرىستىعىن دالەلدەپ بەردى. بۇل جىل تاريحي جادىنى جاڭعىرتۋ، مەملەكەتتىلىكتى جالپى ۇلتتىق بىرلىكتى نىعايتۋ رۋحىندا ءوتتى. فاشيزممەن سوعىستاعى ۇلى جەڭىستىڭ 70 جىلدىق مەرەيتويى، اتا زاڭىمىزدىڭ 20 جىلدىعى ايرىقشا ماڭىزدى وقيعالارعا اينالدى.

 قازاق حاندىعىنىڭ 550 جىلدىعىن جانە قازاقستان حالقى اسسامبلەياسىنىڭ 20 جىلدىعىن سالتاناتتى تۇردە اتاپ وتتىك. ەلدى يندۋستريالدى- يننوۆاتسيالىق جانە ينفراقۇرىلىمدىق دامىتۋ ىسىندە ماڭىزدى ناتيجەلەرگە قول جەتكىزىلدى. مەملەكەت ءوزىنىڭ الەۋمەتتىك مىندەتتەمەلەرىنەن باس تارتقان جوق. قازاقستاندىقتار ەرتەڭگى كۇنگە نىق سەنىمدى. ەۋرازيالىق ەكونوميكالىق وداق اياسىنداعى ەكونوميكالىق ينتەگراتسيا ودان ارى جالعاستى. سونداي- اق، ەلىمىز دۇنيەجۇزىلىك ساۋدا ۇيىمىنا مۇشە بولدى. قازاقستان سىرتقى نارىقتارداعى قولايسىز ىقپالدارعا قاراماستان ەكونوميكالىق جانە الەۋمەتتىك تۇراقتىلىقتى ساقتاپ قالدى.

بۇعان رەسپۋبليكا پارلامەنتىنىڭ زاڭ شىعارۋشىلىق جەمىستى جۇمىسى ەلەۋلى سەپتىگىن تيگىزدى. اعىمداعى الەۋمەتتىك- ەكونوميكالىق شارالار ءۇشىن دە، 5 ينستيۋتتىق رەفورما جۇزەگە اسىرۋ ءۇشىن دە جەدەل جانە ساپالى قۇقىقتىق نەگىز قالاندى. وسى ورايدا، بۇكىل دەپۋتاتتىق كورپۋسقا، سەنات جانە ءماجىلىس اپپاراتتارىنىڭ قىزمەتكەرلەرىنە سىندارلى جۇمىسى جانە مەملەكەتىمىزدىڭ وركەندەۋىنە قوسقان باعا جەتپەس ۇلەستەرى ءۇشىن ريزاشىلىعىمدى بىلدىرەمىن. سىزدەردى كەلە جاتقان جاڭا جىلمەن شىن جۇرەكتەن قۇتتىقتايمىن. بارشاڭىزعا مىقتى دەنساۋلىق، رەسپۋبليكامىزدى دامىتۋ جولىنداعى ەڭبەكتەرىڭىزگە كاسىبي تابىس، وتباسىلىق يگىلىك پەن باق- بەرەكە تىلەيمىن»، - دەلىنگەن ەلباسى قۇتتىقتاۋىندا.

 اۆتور: مارلان جيەمباي