بولاشاقتا كونە جانكەنت شاھارىن تۋريزم ورتالىعىنا اينالدىرۋ مۇمكىندىگى بار - قىزىلوردا - فوتو

استانا. قازاقپارات - ەلىمىزدە قازىرگى كۇنى ەكونوميكانى جان جاقتى دامىتۋ باعىتى قولعا الىندى. ەكونوميكالىق دامۋدىڭ الدىڭعى كەزەڭدەرى قىزىلوردا وبلىسىندا دا قىزۋ قارقىنمەن جۇرگىزىلىپ كەلەدى.

ولاردى ايماقتاعى ورىن الىپ جاتقان وزگەرىستەردەن- اق بايقاۋعا بولادى. بۇگىندە وبلىس ءۇشىن دامۋدىڭ باستى «ءوسۋ نۇكتەلەرى» وبلىس ورتالىعى، شاعىن قالالار جانە تىرەك اۋىلدارىن دامىتۋ بولىپ تابىلادى.

بۇل رەتتە قازالى اۋدانىنداعى وركەندەۋ اۋىلىندا اتقارىلعان جۇمىستاردى ايتا الامىز.

وركەندەۋ اۋىلى تىرەكتى ەلدى مەكەندەر قاتارىنا ەنگىزىلىپ، بيىلعى جىلى «جۇمىسپەن قامتۋ - 2020 جول كارتاسى» باعدارلاماسى شەڭبەرىندە بارلىعى 40,9 ميلليون تەڭگەگە اۋىلدىق كلۋب عيماراتىنا كۇردەلى جوندەۋ جۇمىستارى جۇرگىزىلدى.

سونىمەن قاتار، اۋداندىق بيۋدجەت قارجىسى ەسەبىنەن بولىنگەن 24,3 ميلليون تەڭگە قارجىعا ءبىرقاتار كوشەلەردىڭ اۆتوموبيل جولدارى قالىپقا كەلتىرىلدى.

وڭىرلەردى دامىتۋ باعدارلاماسى اياسىندا 11,5 ميلليون تەڭگەگە كوشەلەردى جارىقتاندىرۋ جۇمىستارى جۇرگىزىلدى. ەلدى مەكەندى اباتتاندىرۋعا 108,3 ميلليون تەڭگە ءبولىنىپ، ورتالىق الاڭ مەن جاستار الاڭى اباتتاندىرىلدى.

تىرەك اۋىلداردى دامىتۋدا ءاربىر اۋداننىڭ بۇرىننان قالىپتاسقان تاريحي- وندىرىستىك ەرەكشەلىكتەرىن ەسكەرگەن ءجون. وركەندەۋ اۋىلىنا ىرگەلەس جاتقان جانكەنت شاھارى كەزىندە ۇلى جىبەك جولىندا جاتقان ساۋدا- ساتتىقتىڭ ۇلكەن قالاسى بولعان. سونىمەن قاتار، ءتۇرلى بۇيىمدار مەن قۇرال- جابدىقتار شىعارۋدىڭ ورتالىعى بولعان. جىل وتكەن سايىن ەجەلگى جانكەنتتىڭ قوينىندا جاتقان تۇڭعيىق سىرلار اشىلۋ ۇستىندە. الداعى ۋاقىتتا قورقىت بابانىڭ تۋعان جەرى، ەجەلگى وعىز مەملەكەتىنىڭ استاناسى بولعان كونە جانكەنت شاھارىن تۋريزم ورتالىعىنا اينالدىرۋعا مۇمكىندىك بار. اشىق مۇراجاي اشىپ، جەرگىلىكتى تۇرعىنداردى جۇمىسقا ورنالاستىرۋ جوسپارلانۋدا.