قانات يسلام: قىتاي قۇراماسىندا قازاقتاردىڭ كوبەيۋى قۋانتادى
- قانات، ەلگە امان- ەسەن ورالۋىڭمەن! ايگىلى پروموۋتەر ەل حەيمونمەن كەلىسىمشارتقا قول قويدىڭ. دەمەك، كاسىپقوي بوكستا ورلەۋگە مۇمكىندىك تۋدى عوي.
- ارينە، ەل حەيموننىڭ ەسىمى كاسىپقوي بوكستا وراسان بەدەلگە يە. ا ق ش- تا عانا ەمەس، الەمگە دە بەدەلدى تۇلعا. وزگەسىن ايتپاعاننىڭ وزىندە كىشى فلويد مەيۆەزەردىڭ سوڭعى جەكپە- جەگىنە دەيىن مەنەدجەرى بولدى. قانداسىمىز بەيبىت شۇمەنوۆكە دە پروموۋتەر بولىپ ءجۇر. ءبىز وسى كەلىسىمشارتتى سەگىز ايعا جۋىق كۇتتىك. وسى ارالىقتا ءتۇرلى ۇسىنىستار، وزگە پروموۋتەرلىك كومپانيالاردان شاقىرتۋلار بولدى. ءبىراق ولاردىڭ ۇسىنىس، شارتى ءبىزدىڭ تالعامىمىزدان شىققان جوق. ەل حەيموننىڭ پروموۋتەرلىك كومپانياسى كەلەسى جىلى بەس جەكپە- جەك وتكىزۋگە مۇمكىندىك تۋعىزامىز دەپ وتىر.
- الداعى جەكپە- جەكتەردە قارجىلاي سىياقى تولەنە مە؟
- وسى كۇنگە دەيىنگى وتكىزگەن ايقاستارىمنىڭ دەنى دارەجە كوتەرۋ ءۇشىن بولدى. مايتالمان مەنەدجەر ەل حەيمونمەن تىزە قوسىپ جۇمىس ىستەيتىن بولعاندىقتان، ەندىگى ايقاستاردا سىياقى تولەنۋى ءتيىس.
- قازاق بوكسىنا ەڭبەگى سىڭگەن باپكەر عالىم جارىلعاپوۆتى ەسكە تۇسىرۋگە ارنالعان حالىقارالىق تۋرنيردى تاماشالادىڭ. بوكسشىلارىمىزدىڭ شاما- شارقى قاي دەڭگەيدە ەكەن؟
- ۇلتتىق قۇرامانىڭ بەلدى بوكسشىلارى اتانىپ، بىرنەشە جىلدان بەرى ءبىرىنشى ءنومىرلى اتانىپ جۇرگەن كەي بوكسشىلاردىڭ اتىنان اۋىپ قالۋىنان- اق تۋرنيردىڭ دارەجەسى قاي دەڭگەيدە ەكەنىن باعامداۋعا بولادى. قازاق بوكسىندا جاستاردىڭ تەگەۋرىنى قۋانتتى. الەم چەمپيوناتىندا، جازعى وليمپيادا ويىندارىندا ولجا سالىپ جۇرگەن ساڭلاقتاردى سۇرىندىرگەن جاستاردىڭ جىگەرلى ەكەنىنە رازى بولدىم.
- وسى تۋرنيرگە قىتاي قۇراماسى دا قاتىستى. حانزۋلاردىڭ قاتارىندا قازاق بوكسشىلارى بولعانىنا رازى بولدىق. ءوزىڭ ون مارتە قىتاي چەمپيوناتىندا توپ جاردىڭ، الەم چەمپيوناتىنىڭ، بەيجىڭ وليمپياداسىنىڭ قولا جۇلدەسىن يەلەندىڭ.
- وكشەمىزدى باسىپ كەلە جاتقان جاستاردىڭ قىتاي قۇراماسىنا ەنۋى وراسان جەتىستىك. ميللياردتاعان حانزۋدىڭ اراسىندا ءجۇرىپ، قۇراماعا ىلىنۋ ءۇشىن از كۇشىڭدى سارقىمايسىڭ. بىزدەن كەيىن جارقىراپ كورىنگەن جىگىتتەردىڭ جەكپە- جەگىن وسى تۋرنيردە باعامدادىم، جۇدىرىقتاسۋ شەبەرلىكتەرى شىڭدالىپ كەلەدى ەكەن.
سۇحباتتاسقان ن. جومارت، «جاس الاش»
