تابيعاتى وزگەشە تالانت
كوزى تىرىسىندە ابىرويىنا ءاجىم، ازاماتتىعىنا كولەڭكە تۇسىرمەي ومىردە دە، ونەردە دە ار تازالىعىن اسقاق تۇتادى. سوندىقتان دا وزىندەگى ىزگى ادامگەرشىلىك، بيىك پاراساتىمەن نۇرلانعان ۇلى تالانتتى كەلبەتى ۇزەڭگىلەستەرىنەن ءاردايىم وقشاۋ تۇراتىن.
جالعان جايدارىلىق، جاساندى كەربەزدىك، كۇماندى كەمەڭگەرلىك، ارزان ابىروي، تاتىمسىز تاكاپپارلىق، دايەكسىز دىلمارلىك، جايداق جاعىمپازدىق، جاياۋ جالتاقتىق، ءىشى ەسەپ سۇيىق سىپايىلىقتان و باستان بويىن اۋلاق ۇستاعان ۇستازدىق ۇلگىسى مول ءاز اعانىڭ سالقىن سابىر، سانالى بالامدارىنا جۇگىنبەي جۇرگەن كۇنىمىز بولمايتىن. كەيدە قاڭقۋ سوزدەن قيانات، قايىرىمنان قاعاجۋ كورە باستاعانىمىزدا تورەلىكتى عابەڭنەن ىزدەپ، ءپاتۋالى اقىلدى ءوز اۋزىنان تىڭداپ سابامىزعا ءتۇسىپ، سابىرعا كەلىپ قايتاتىنبىز.
ونەردەگى ءىرى تۇلعالاردىڭ ەلىكتەرلىك ەرەكشەلىگىمەن قاتار وزىنە ءتان وسالدىعى بولاتىنى ءمالىم. وسالدىعىن وزگەشەلىگىم دەپ تانىعانداردىڭ تارازىسى جەڭىلدەي، تابيعي تالانتىنىڭ قۇنىن كەمىتىپ الاتىن ناۋقاسى جانە بار. توڭىرەگىمدەگىلەردەن ايبىنىم اسىپ، مىسىم باسىپ تۇرسا، وزگەدەن گورى ءوزىمدى سىيلاسا، قوعاداي جاپىرىلىپ تۇرسا دەگەن ءمانسىز مانساپ قۇمارلىق، كور كەۋدە، ميعۇلا مەنمەندىكتەن تۋىندايتىن پەندەشىلىك پيعىلدان اتىمەن ادا عابەڭنىڭ قاراپايىمدىلىعى سورلاتقاندا بويىمىزدان تابىلا بەرمەيتىن قاسيەت ەدى.
كوپ جىلدان بەرى وقي، كورە-بىلە جۇرە عابەڭمەن ساپارلاس بولعاندا ءوز بويىمىزداعى ءمىن-مىنەزدى اڭعارىپ قالۋ ونشا قيىندىققا تۇسپەيتىن. وزات وزگەنى دە، وزىندەگى ونەردى دە ءپىر تۇتىپ، پاك ۇستاعان عابەڭنىڭ كوزگە ۇرىپ تۇرعان كەمشىلىگىن بايقاماعان بىزدەردىڭ كوڭىلىمدەگى ونىڭ اعالىق مەيىرىمى مەن ءادىل قازىلىعى، ۇستازدىق ۇلگىسى مەن اسقاق ازاماتتىعى ۇيالاپ قالىپتى. قىسقاسى، عابەڭنىڭ ءجۇرىس- تۇرىسى، مىنەز- قۇلقى، ەسەپسىز ەڭبەكقورلىعى مەن ونەردەگى قاتاڭ تالاپتى الدىمەن وزىنە قوياتىندىعى ونەگە عانا ەمەس، ولشەم ەدى.
عابەڭ تۋىندىلارىنىڭ ومىرلىك وزەگى - شىنايى شىندىعىندا جاتىر. جالعان بوياۋ، جاساندى وقيعالار عابەڭە جات. كەيىپكەرلەرىنىڭ ءتىلى دە قاراپايىم، اشەكەي، الەم- جالەمنەن اۋلاق - تابيعي. جاعىمدى- جاعىمسىز دەگەندەردىڭ دە ارا-سالماعى ءداۋىر، زامان شىندىعىنان الشاق كەتپەيدى. جازۋشى ەش ۋاقىتتا جەك كورگەنىن جەرلەپ، جاقسى كورگەنىن جالاۋلاتىپ جاتپايدى. سويتە تۇرا وقۋشى كىمنىڭ كىم ەكەنىن انىق تانيدى. ونىڭ ءبارى جازۋشىنىڭ تالقىسىنان تۋمايدى، كەيىپكەردىڭ مىنەز- قۇلقىنان، ءىس-ارەكەتىنەن ءوربىپ كەتەدى.
عابەڭ كوبىنە وقيعا قۋالامايدى، وقيعادان گورى ادام پسيحولوگياسىنا ىقىلاس اۋدارادى. كەيدە جايدارى يۋمور، ءماندى مىسقىل، كەكسىز كەكەسىن، ءزىلسىز ءاجۋانىڭ وزىمەن-اق پورترەت بوياۋلارىن قۇلپىرتىپ وتىرادى.
عابەڭدەي ءسوز زەرگەرىنىڭ شىعارمالارىنداعى «تانىس بەيتانىستارى» زامانا كۋاگەرلەرىندەي تالاي بۋىننىڭ سىرلاسىنا اينالاتىنىنا كۇمان جوق. ويتكەنى، ۇلى سۋرەتكەردىڭ مول مۇراسىندا كەلەر ۇرپاقتىڭ اتا- بابالارىنىڭ قۋانىش- قايعىسى، جەڭىسى- جەمىسى، زار- مۇڭى، ارمان- اڭساۋى، سىر- سيپاتى، تىرلىك- تىنىسى، وي- ورەسى، قيال- قاناتى جاتىر. دەمەك ادام بالاسىنىڭ تاريحي تاجىربيەسىندە وندايعا ورالمايتىن ۇرپاق بولمايدى.
جازۋشى قالتاي مۇحامەدجانوۆتىڭ ەستەلىگىنەن
