قازىر قازاقستانداعى عىلىم ەكونوميكا مۇددەسى ءۇشىن جۇمىس ىستەمەي تۇر - دەپۋتات
بۇگىن «عىلىمي جانە (نەمەسە) عىلىمي- تەحنيكالىق قىزمەت ناتيجەلەرىن كوممەرتسيالاندىرۋ تۋرالى» ق ر زاڭىن تانىستىرۋعا ارنالعان «نۇر وتان» پارتياسىنداعى بريفينگ بارىسىندا پارلامەنت ءماجىلىسىنىڭ دەپۋتاتى ۋاليحان بيشيمبايەۆ وسىلاي دەپ مالىمدەدى.
«قازاقستان جاڭا جاھاندىق ناقتى احۋالدا: ءوسۋ. رەفورمالار. دامۋ» اتتى بيىلعى جولداۋىندا مەملەكەت باسشىسى قازاقستان ەكونوميكاسىنىڭ يننوۆاتسيالىق الەۋەتىن ارتتىرۋ كەرەك دەگەن تاپسىرما جۇكتەدى. مىنە، بۇل ماقساتقا عىلىمي- يننوۆاتسيالىق جۇيەنى ءتيىمدى دامىتۋ ارقىلى عانا قول جەتكىزۋگە بولادى. ءبىراق، وكىنىشكە وراي، قازاقستاندا عىلىمي زەرتتەۋلەردى وندىرىسكە ەنگىزۋ ماسەلەسى ءالى شەشىمىن تاپقان جوق، ال، بۇل قوعام تاراپىنان سىنعا ۇشىراپ وتىر. عىلىمدى قارجىلاندىرۋ دەڭگەيى جىل سايىن ارتىپ كەلە جاتقانىنا قاراماستان، ەلىمىز بويىنشا 392 عىلىمي ۇيىم بار ەكەنىنە قاراماستان، ازىرگە عىلىم ەل ەكونوميكاسىنىڭ مۇددەسى ءۇشىن جۇمىس ىستەمەي تۇر. بيزنەس تاراپىنان عىلىمي جوبالارعا دەگەن سۇرانىس از، عىلىم ءوز الدىنا، ءوندىرىس ءوز الدىنا دامىپ، ارالارى كەيدە عانا توعىسادى»، - دەيدى دەپۋتات.
ۋ. بيشيمبايەۆ اتاپ وتكەندەي، قازىر عىلىمي جوبالاردىڭ، عىلىمي زەرتتەۋلەردىڭ بارلىعى لابوراتوريادان اسا المايدى، تەك بىرەن- ساران جوبالار عانا وندىرىسكە قوسىلادى. ال، عىلىمدى كوممەرتسيالاندىرۋدىڭ باستى ماقساتى - عىلىمي جوبانى دايىن ونىمگە اينالدىرۋ.
- عىلىمي جوبانى دايىر ونىمگە ايناددىرۋ ءۇشىن عالىم دا، ءوندىرىس تە، ينۆەستورلار دا جۇمىلا جۇمىس ىستەۋ كەرەك، - دەيدى دەپۋتات.
«وسى ماسەلەنى شەشۋ ءۇشىن، «100 ناقتى قادام» ۇلت جوسپارىنىڭ 64- قادامىنا ساي، «عىلىمي جانە (نەمەسە) عىلىمي- تەحنيكالىق قىزمەت ناتيجەلەرىن كوممەرتسيالاندىرۋ تۋرالى» جاڭا زاڭ ازىرلەنگەن ەدى. ەندى وسى زاڭ جوباسى يننوۆاتسيالىق زەرتتەۋلەردى وندىرىسكە ەنگىزۋ ءۇشىن عىلىمدى قارجىلاندىرۋ تەتىكتەرىن كوزدەيدى»، - دەدى ۋ. بيشيمبايەۆ.
اۆتور: كەنجەكەي توقتامۇرات قىزى
