ۇجىمدىق قاۋىپسىزدىك كەڭەسىنىڭ وتىرىسىندا مەملەكەت باسشىلارى انتيتەررورلىق كواليتسيا قالىپتاستىرۋ قاجەتتىگىنە توقتالدى

استانا. قازاقپارات - وتىرىسقا سونداي-اق ارمەنيا رەسپۋبليكاسىنىڭ پرەزيدەنتى س. سارگسيان، بەلارۋس رەسپۋبليكاسىنىڭ پرەزيدەنتى ا. لۋكاشەنكو، قىرعىز رەسپۋبليكاسىنىڭ پرەزيدەنتى ا. اتامبايەۆ، رەسەي فەدەراتسياسىنىڭ پرەزيدەنتى ۆ. پۋتين جانە تاجىكستان رەسپۋبليكاسىنىڭ پرەزيدەنتى ە. راحمون قاتىستى.

بۇل تۋرالى اقوردانىڭ باسپا ءسوز قىزمەتى حابارلادى.

كەزدەسۋ بارىسىندا تاراپتار ۇجىمدىق قاۋىپسىزدىك ۇيىمىنىڭ جاۋاپكەرشىلىگى ايماعىنداعى قازىرگى احۋال مەن الەمنىڭ ءبىرقاتار وڭىرلەرىندەگى شيەلەنىستىڭ ۋشىعۋىنا بايلانىستى ۇيىمنىڭ بۇدان ارعى ءىس- قيمىلى جونىندە پىكىر الماستى. سونىمەن قاتار ۇجىمدىق قاۋىپسىزدىك ۇيىمىنىڭ تۇراقتى ورگاندارىنىڭ لاۋازىمدى تۇلعالارىنىڭ روتاتسياسى ماسەلەلەرى قارالدى.

مەملەكەتتەر باسشىلارى ب ۇ ۇ جارعىسىنا، حالىقارالىق قۇقىق نورمالارى مەن قاعيداتتارىنا سايكەس كەڭ اۋقىمدى انتيتەررورلىق كواليتسيا قالىپتاستىرۋ قاجەتتىگىنە توقتالدى. وتىرىسقا قاتىسۋشىلار تەرروريزمگە قارسى كۇرەس ونى قارجىلاندىرۋ كوزدەرىن شەكتەمەيىنشە ناتيجەلى بولمايتىنىن اتاپ ءوتتى.

ءىس- شارادا سيرياداعى انتيتەررورلىق ءىس- قيمىلعا قاتىسقان رەسەيدىڭ سۋ-24 اسكەري ۇشاعىن اتىپ تۇسىرۋگە بايلانىستى وقيعا دا تالقىلاندى.

تاراپتار ۇ ق ش ۇ- نىڭ كۇش- قۋات الەۋەتىن نىعايتۋعا، كونترتەررورلىق باعىتتاعى جۇمىستارىن جانداندىرۋعا، جاڭا قاۋىپتەر مەن سىن-قاتەرلەرگە قارسى ءتيىمدى ءىس- قيمىل جاساۋ ماقساتىندا جەدەل ارەكەت ەتەتىن ۇجىمدىق كۇشتەردىڭ دايىندىعىن ارتتىرۋعا نيەتتى ەكەنىن قۋاتتادى.

سونىمەن قاتار مەملەكەتتەر باسشىلارى ءبىراۋىزدان ۇ ق ش ۇ باس حاتشىسى ن. بورديۋجانىڭ وكىلەتتىك مەرزىمىن 2017 -جىلعى 1 -قاڭتارعا دەيىن ۇزارتۋ تۋرالى شەشىم قابىلدادى.

كەزدەسۋ قورىتىندىسى بويىنشا مىناداي قۇجاتتار قابىلداندى:

- ۇجىمدىق قاۋىپسىزدىك ۇيىمىنىڭ مەملەكەتتەرى باسشىلارىنىڭ مالىمدەمەسى؛

- ۇجىمدىق قاۋىپسىزدىك ۇيىمى ۇجىمدىق قاۋىپسىزدىك كەڭەسىنىڭ « ۇجىمدىق قاۋىپسىزدىك ۇيىمى تۇراقتى قىزمەت ەتەتىن جۇمىس ورگاندارىنىڭ لاۋازىمدى تۇلعالارىنىڭ روتاتسياسى تۋرالى» شەشىم؛

- ۇجىمدىق قاۋىپسىزدىك ۇيىمى ۇجىمدىق قاۋىپسىزدىك كەڭەسىنىڭ «ۇ ق ش ۇ باس حاتشىسى تۋرالى» شەشىمى.