قانات يسلام: كەلەسى كەزدەسۋدى قىتايدا وتكىزۋىم مۇمكىن
ول WBA Fedelatin نۇسقاسى بويىنشا امەريكا ايماعى چەمپيونى اتاعىن دا قورعاپ قالدى.
قىتايدا تۋعان ەتنيكالىق قازاق قانات يسلام 2008-جىلى بەيجىڭ وليمپياداسىنا سول ەلدىڭ اتىنان قاتىسىپ، قولا جۇلدە يەلەنگەن. ول 2010-جىلى قازاقستان ازاماتتىعىن الىپ، «استانا ارلاندارى» كلۋبىندا بوكستاسقان. ءبىراق 2012-جىلى لوندون وليمپياداسىنا قازاقستان اتىنان قاتىسۋىنا بايلانىستى ازاماتتىق-قۇقىقتىق داۋ تۋعان سوڭ كاسىپقوي بوكسقا بەت بۇرىپ، ا ق ش- قا كەتكەن. سپورتشى تىلشىمىزگە بەرگەن سۇحباتىندا الداعى جوسپارلارىمەن دە ءبولىستى.
- سوڭعى كەزدەسۋدە ءسىزدى مەكسيكالىق الەكسيس كاماچومەن رينگكە شىعادى دەپ حابارلانعان. ءبىراق سوڭعى ساتتە قارسىلاسىڭىز اۋىستى. نە سەبەپ بولدى؟
- مەكسيكالىق بوكسشى باسىندا «كەزدەسۋگە شىعامىن» دەپ كەلىسىم بەرگەن. ءبىراق سوڭعى ساتتە جەكپە-جەكتەن باس تارتتى. شىقپايمىن دەگەندى قيناي المايسىڭ. باسقا امال جوق.
- جىل باسىندا «بيىل بەس-التى كەزدەسۋ وتكىزۋدى جوسپارلايمىن» دەپ مالىمدەگەن ەدىڭىز. ءبىراق بيىل رينگكە ەكى رەت قانا شىقتىڭىز. جوسپارىڭىزدى ورىنداۋعا نە كەدەرگى بولىپ جاتىر؟
- كاسىپقوي بوكستا ءبارى بوكسشى قالاعانداي بولا قويمايدى. جوسپاردىڭ ورىندالماۋىنا سەبەپ كوپ. ماسەلەن، مەنىڭ دارەجەمدەگى قارسىلاستار تابىلمادى. كەي بوكسشىلار ءوز تالاپتارىن قويدى. ەكى جاق - مەنىڭ پروۋموۋتەرىم مەن قارسىلاس بوكسشىنىڭ كومپانياسى كەلىسە الماعان جايتتار دا بولدى. تامىزدا ءبىر-ەكى قارسىلاس كەلىسىم بەرىپ، كەيىن جەكپە-جەككە شىقپاي قويدى.
- كوپتەگەن بوكس ماماندارى «قانات يسلام الەمدىك دەڭگەيگە شىعۋى ءۇشىن مىقتى مەنەدجەر نەمەسە پروۋموۋتەرلەرمەن جۇمىس ىستەۋ كەرەك» دەگەن پىكىردى ءجيى ايتادى. بەدەلدى بوكس مەنەدجەرلەرىمەن جۇمىس ىستەۋگە مۇمكىندىك بار ما؟
- پروۋموۋتەرىمدى اۋىستىرمايمىن. ياعني، بۇرىنعى پروۋموۋتەرىم نەلسون لوپەسپەن جۇمىس ىستەي بەرەمىن. تاعى ءبىر جاقسى جاڭالىق - كاسىپقوي بوكستاعى ەڭ بەدەلدى Showtime تەلەارناسىنىڭ يەسى، امەريكاداعى نومەرى ءبىرىنشى مەنەدجەر سانالاتىن ەل حەيمونمەن كەلىسىم-شارتقا قول قويدىم. الداعى ۋاقىتتا ول مەنىڭ كەزدەسۋلەرىمدى ۇيىمداستىرۋعا كومەكتەسەدى. ول وسىعان دەيىن مەيۆەزەردىڭ مەنەدجەرى بولدى. قازىر قازاقستاندىق بوكسشى بەيبىت شۇمەنوۆپەن دە جۇمىس ىستەپ جاتىر.
- ءار كەزدەسۋىڭىزدەن گونورار الاسىز با؟
- گونورار تۋرالى ايتۋعا ءالى ەرتە. سوڭعى كەزدەسۋدە لاتىن امەريكاسى چەمپيونى دەگەن اتاعىمدى قورعادىم. الداعى كەزدەسۋلەرىمدە IBF، WBC تۇجىرىمدارى بويىنشا رەيتينگتىك كەزدەسۋلەر وتكىزسەم دەگەن جوسپارلارىم بار.
- بىلتىر «استانا» پرەزيدەنتتىك كلۋبىمەن ارالارىڭىزدا كەلىسسوزدەر بولعان ەدى. ودان ناتيجە بار ما؟ سىزگە «استانا» كلۋبى الداعى ۋاقىتتا دەمەۋشى بولا ما؟
- بىلتىر «استانا» كلۋبىمەن كەلىسسوز جۇرگىزدىك. مەن ءوز شارتتارىمدى، ولار ءوز شارتتارىن ايتتى. كەيىن «داعدارىس، بيۋدجەتتى قىسقارتىپ جاتىر» دەپ، كەلىسسوزدەر توقتادى.
- 21-كەزدەسۋىڭىزدى قاشان وتكىزبەكسىز؟
- ازىرگە جۇمىستار جۇرگىزىلىپ جاتىر. قىتايدان، رەسەيدەن ۇسىنىس بار. كەلەسى كەزدەسۋدى قىتايدا وتكىزۋىم دە مۇمكىن. ءبىراق ناقتى ۋاقىتى بەلگىسىز.
- قازاقستاندا جەكپە-جەك وتكىزۋگە مۇمكىندىك بار ما؟
- قازاقستاندا جەكپە-جەك وتكىزۋگە مۇمكىندىك از. «كەل، مەن جەكپە-جەگىڭدى وتكىزىپ بەرەيىن» دەپ شاقىرىپ جاتقان ەشكىم جوق. ءوزىم بارىپ وتكىزبەيمىن عوي. بىزدە (قازاقستاندا - رەد.) كاسىپقوي بوكس كەشتەرىن ۇيىمداستىرۋ دامىماعانىن بىلەسىز. ءبىراق الداعى ۋاقىتتا ءبىر كەزدەسۋ وتكىزۋگە مۇمكىندىك بولسا ەكەن دەيمىن.
- سۇحباتىڭىزعا راحمەت.
«الامان»
