اباي ەسكەرتكىشى قىرعىزستان، مىسىر جانە ماكەدونيادا بوي كوتەرەدى

 استانا. قازاقپارات - اباي قۇنانبايەۆتىڭ ەسكەرتكىشىن قىرعىزستاندا ورناتۋ جونىندە ناقتى تاپسىرما بولسا، مىسىر مەن ماكەدونيا ەسكەرتكىش ورناتۋدى وزدەرى ۇسىنىپ وتىر.

  بۇل تۋرالى zakon.kz پورتالىندا وتكەن «مينيسترگە سۇراق قوي» اتتى ونلاين- كونفەرەنسيادا ق ر مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى.

 «قازاقتىڭ ۇلى اقىنى ابايدىڭ مارتەبەسى تەك ەلىمىزدىڭ كولەمىندە ەمەس، شەت ەلدەردە دە اسقاق ەكەنى بەلگىلى. اباي ەسىمىمەن ەلىمىزدىڭ ءار ەلدى مەكەنىندە كوشە، وقۋ، مادەنيەت ۇيىمدارى اتالىپ، بارلىق باس قالالارىندا جانە ءىرى ەلدى مەكەندەرىندە ەسكەرتكىشتەر ورناتىلعان. سونىڭ ىشىندە، استانا قالاسىنداعى اباي داڭعىلى مەن اۋەزوۆ كوشەلەرىنىڭ قيىلىسىندا ابايدىڭ مونۋمەنتالدى ەسكەرتكىشى بوي كوتەرگەن»، - دەدى مينيستر.

 سونىمەن قاتار ول اباي قۇنانبايەۆتىڭ شەت ەلدەردە تەك شەت تىلدەرىنە اۋدارىلعان شىعارماشىلىعى ارقىلى عانا تانىمال ەمەستىگىن، ونىڭ ەسىمىمەن باكۋ، تاشكەنت، بىشكەك، كاير، بەرلين، دەلي، كيەۆ قالالارىندا كوشەلەر اتالعان دەپ وتكەن.

 «ال ونىڭ مونۋمەنتالدى ەسكەرتكىشتەرى رەسەيدىڭ ماسكەۋ قالاسىنىڭ ورتالىعىندا، تاشكەنت (وزبەكستان) قالاسىندا، ۆەنگريا، يران، قىتاي ەلدەرىنىڭ باس قالالارىندا ورناتىلعان. بۇدان وزگە اباي ەسكەرتكىشىن جۋىق مەرزىمدە بىشكەك قالاسىندا (قىرعىز رەسپۋبليكاسى) ورناتۋ جونىندە تاپسىرما بار. سونداي- اق، ونىڭ ەسكەرتكىشتەرىن مىسىر اراب رەسپۋبليكاسىنىڭ كاير قالاسىندا، ماكەدونيانىڭ سكوپە قالاسىندا ورناتۋ جونىندە شەت ەلدەردەن ۇسىنىستار بار»، - دەيدى ا. مۇحامەدي ۇلى.

 اۆتور: مارلان جيەمباي