استاناعا ادەبيەت سالاسى بويىنشا نوبەل سىيلىعىنىڭ يەگەرى مو يان كەلەدى
شارا ق ر مادەنيەت جانە سپورت مينيسترلىگىنىڭ باستاماسىمەن قازاقستان رەسپۋبليكاسىنىڭ تۇڭعىش پرەزيدەنتى كۇنىنە بايلانىستى «وقىرمان قاۋىم - ۇلى دالا ەلىنىڭ بولاشاعى» تاقىرىبىنداعى حالىقارالىق وقۋ كونگرەسى شەڭبەرىندە ۇيىمداستىرىلىپ وتىر.
«ادەبيەت - شەكسىز شىعارماشىلىق الاڭى» دەگەن سەكسيا بويىنشا وتەتىن شاراعا قىتاي جازۋشىسى، نوبەل سىيلىعىنىڭ يەگەرى مو يان، قازاقستان جازۋشىلار وداعىنىڭ ءتوراعاسى نۇرلان ورازالين، قىرعىزستان رەسپۋبليكاسى جازۋشىلار وداعى ءتوراعاسىنىڭ ورىنباسارى نۇرلان قالىبەكوۆ جانە قازاق ادەبيەتىنىڭ تانىمال تۇلعالارى ءابىش كەكىلبايەۆ، دۋلات يسابەكوۆ جانە تاعى باسقا جازۋشىلار قاتىسادى.
كەزدەسۋ بارىسىندا كىتاپ ناسيحاتى، كىتاپ وقۋ ماسەلەسى تالقىلانىپ، ءار ەلدەردەگى حالىقتى كىتاپ وقۋعا بەيىمدەۋ، كىتاپ شىعارۋ قىر- سىرلارى تالقىلانىپ، پىكىر تالاس ۇيىمداستىرىلادى.
