قازاقستانداعى ەڭ ۇلكەن مەديتسينالىق ۋنيۆەرسيتەتتىڭ رەكتورى ءىستى بولدى

الماتى. قازاقپارات - س. اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ رەكتورى ايقان اقانوۆ ءىستى بولدى.

وعان مەملەكەت قارجىسىن جىمقىردى دەگەن ايىپ تاعىلدى.

ءىس ماتەريالدارىنا سايكەس، 2012 -جىلدىڭ تامىزىندا قاز ۇ م ۋ مەن «فلامينگو-9» ج ش س اراسىندا جاتاقحانا قۇرىلىسى تۋرالى كەلىسىمگە قول قويىلعان. 512 ورىنعا ارنالعان جاڭا نىسان قۇرمانعازى كوشەسىنىڭ بويىندا سالىنۋى ءتيىس بولاتىن.

قۇرىلىس كەزىندە ج ش س ءۇش ليفت پەن تەحنولوگيالىق قۇرالدى تاپسىرماي تۇرىپ، عيماراتتى قابىلداۋ اكتىسىن وتكىزگەن. وندا 48997054 تەڭگە شىعىن كەتكەنى جازىلعان. ەكس-رەكتور اتالعان قۇجاتقا قول قويعان. وسىلايشا، بۇل سوما ج ش س- نىڭ شوتىنا نەگىزسىز اۋدارىلادى.

كەيىن بەلگىلى بولعانداي، اقشا ءوز ماقساتىندا جۇمسالماي، بانكتەگى نەسيەنى جابۋعا، ج ش س جۇمىسشىلارىنا جالاقى رەتىندە ءبولىنىپ بەرىلگەن. 2013 -جىلدىڭ جوبالىق-سمەتالىق قۇجاتتاماسىنىڭ وزگەرۋىنە بايلانىستى جاتاقحانا قۇرىلىسى توقتاتىلادى.

سوت بارىسىندا ايقان اقانوۆ ءوزىنىڭ قىزمەتتىك وكىلەتتىگىن اسىرا پايدالانعانىن مويىنداعانىمەن، اقشا ۇرلاۋ ايىبىمەن كەلىسپەي قويدى.

سوت پروتسەسىنە قاتىسقان ۋنيۆەرسيتەت وكىلدەرى اقانوۆقا ەشقانداي كىنا ارتپايتىندىقتارىن ايتىپ، ونى باس بوستاندىعىنان ايىرماۋدى ءوتىندى.

سۋديا اقانوۆتى ق ر ق ك 307-بابىنىڭ 2-بولىمىمەن ايىپتى دەپ تاۋىپ، 2000 ا ە ك (3964000 تەڭگە) كولەمىندە ايىپپۇل سالدى. سونداي-اق ايقان اقانوۆ 7 جىل بويى مەملەكەتتىك قىزمەت اتقارۋ قۇقىعىنان ايرىلدى.

اۆتور: گۇلميرا عوسمان-ءالي