قازاقستاندا ءدىني مەدرەسەلەردىڭ اتاۋى وزگەرتىلدى
«ءبىز ساناۋلى مەرزىم ىشىندە مەدرەسە جۇمىستارىنا ەلەۋلى رەفورمالار جاسادىق. مەدرەسەلەردىڭ وقۋ باعدارلامالارىنا وزگەرىستەر مەن تولىقتىرۋلار ەنگىزىلدى. مىندەتتى ءدىني پاندەردەن بولەك، قازىرگى زامان تالابىنا ساي، ولارعا قوعامدىق ماماندىقتار دا قوسىلدى. سونىمەن، مەدرەسەلەرىمىز كوللەدج دەڭگەيىنە كوتەرىلدى. جاڭا تۇجىرىمداماعا سايكەس، ولار مەدرەسە-كوللەدج دەپ اتالادى. سول مەدرەسە- كوللەدجدەرىمىزدى بىتىرگەن شاكىرتتەر باسقا دا زايىرلى وقۋ ورىندارىنا بارىپ، سول ديپلوممەن وقۋعا تۇسە الادى جانە مەملەكەتتىك مەكەمەلەردە ءدىني جانە زايىرلى ماماندىقتار بويىنشا قىزمەت ەتە الادى. بۇل بولاشاق ءدىن قىزمەتكەرلەرى ءۇشىن ۇلكەن مۇمكىندىك، زور جەتىستىك دەپ اتار ەدىم»، - دەدى ءوز بايانداماسىندا باس ءمۇفتي ەرجان قاجى مالعاجى ۇلى.
سونىمەن قاتار، باس ءمۇفتي مەدرەسەلەردىڭ كوللەدجدەرگە ءبىر مەزەتتە ەمەس، كەزەڭ- كەزەڭمەن كوتەرىلەتىندىگىن باسا ايتتى.
«ءبىز بيىل شاكىرتتەردى مەدرەسەلەرگە تۇڭعىش رەت توعىزىنشى سىنىپتان باستاپ قابىلدادىق. بۇعان دەيىن تەك ون ءبىرىنىشى سىنىپتى بىتىرگەن مەكتەپ تۇلەكتەرىن عانا قابىلداپ كەلگەن ەدىك. ازىرگە ەكى مەدرەسە الماتى وبلىسىنىڭ قاراساي اۋدانىنداعى شامالعان ەلدى- مەكەنىندە ورنالاسقان «ءۇشقوڭىر» مەدرەسەسى مەن وڭتۇستىك قازاقستان وبلىسىنىڭ سارىاعاش اۋدانىنداعى ىنتىماق ەلدى مەكەنىندە ورنالاسقان «سارىاعاش» مەدرەسەسىنە كوللەدج مارتەبەسى بەرىلدى. ال قالعان مەدرەسەلەر كوللەدجىك وقۋ ورنىنىڭ تالاپتارىنا سايكەستەندىرىلىپ، كەزەڭ- كەزەڭمەن وتەتىن بولادى»، - دەدى ەرجان قاجى مالعاجى ۇلى.
ايتا كەتەلىك، قازىر ەلىمىزدە بارلىعى توعىز مەدرەسە جۇمىس ىستەيدى. ولار ەلىمىزدىڭ ءار ءتۇرلى وڭىرلەرىندە ورنالاسقان.
«ءدىني ءبىلىم تۇتاستىعى ءدىني تۇراقتىلىق كەپىلى» اتتى رەسپۋبليكالىق تاجىريبەلىك كونفەرەنسيانىڭ جۇمىسى ودان ءارى جالعاسۋدا.
اۆتور: جاپپاربەرگەن ايبوتا
