قازاقستاندىق پويىزداردا دۇنيەگە كەلگەن سابيلەرگە جولسەرىكتەردىڭ ەسىمى بەرىلگەن
باسپا ءسوز قىزمەتىنىڭ مالىمەتىنشە، جىل باسىنان بەرى «قازاقستان تەمىر جولى» ۇ ك» ا ق جولاۋشىلار پويىزىندا جەتى ءسابي دۇنيەگە كەلگەن.
كەشە كەشكە «اقتوبە - استانا» باعىتىنداعى «تۇلپار- تالگو» پويىزىندا جولاۋشى جاس ايەلدىڭ تولعاعى باستالدى. جولاۋشىلار اراسىندا مەديتسينالىق قىزمەتكەردىڭ بولماۋى، ال ەڭ جاقىن دەگەن ايتەكە ءبي - توبىل وتكەلىگىنە دەيىن كەم دەگەندە ءتورت ساعاتتىق جولدىڭ بارى جاعدايدى ۋشىقتىرا ءتۇستى.
«پويىز بريگادالارىنىڭ ويلانۋعا ۋاقىتى بولمادى، سەبەبى جاس انانىڭ جاعدايى كەزەك كۇتتىرمەدى. جولسەرىك اينۇر ايماعامبەتوۆا ايەلدى جەكە كۋپەگە اۋىستىردى. تۇنگى ەكىدە سول كۋپەدەن ءسابيدىڭ ىڭگالاعان داۋسى ەستىلدى. ستانسياعا كەلىسىمەن، انا مەن جاڭا تۋعان ءالىمحان «جەدەل جاردەم» مەديتسينالىق قىزمەتكەرلەرىنىڭ قولىنا تاپسىرىلدى»، - دەپ حابارلادى باسپا ءسوز قىزمەتىندەگىلەر.
وسىعان ۇقساس جاعداي ءبىراز ۋاقىت بۇرىن «استانا - تۇركىستان» باعىتىنداعى پويىزدا دا بولدى. ول كەزدە تاڭ سارىدە ۇل بالا دۇنيە ەسىگىن اشتى. جولاۋشىلار بالاعا بىردەن اقجول ەسىمىن قويدى. شۋ ستانسياسىندا ءسابي مەن ونىڭ اناسىنا كەرەكتى كومەكتەر كورسەتىلدى. بيىل قىركۇيەك ايىندا «استانا - الماتى-2» باعىتىنداعى «تۇلپار - تالگو» پويىزىندا ارلەن ەسىمدى ءسابي دۇنيەگە كەلدى. ونىڭ ەسىمى جولسەرىكتىڭ قۇرمەتىنە قويىلعان.
ۇلتتىق تاسىمالداۋشى كومپانيا وكىلدەرىنىڭ مالىمدەۋىنشە، جولدا تۋىلعان نارەستەلەردىڭ باسىم بولىگىنە جۇكتى ايەلدى بوساندىرعان جولسەرىكتەردىڭ ەسىمدەرى بەرىلەدى.
«ق ت ج» ۇ ك» ا ق جولسەرىكتەردى دايىنداۋدا ولاردىڭ بىلىكتىلىگى مەن شەبەرلىگىنە اسا ءمان بەرەدى. پويىز بريگادالارى ءۇشىن ارنايى قۇرىلعان ءبىلىم بەرۋ ورتالىعىندا كاسىبي جاتتىقتىرۋشى- كەڭەسشىلەر جۇمىس ىستەيدى. مۇندا تەمىرجولشىلارعا قارىم- قاتىناس ەتيكاسى، سويلەۋ مادەنيەتى، ستاندارتتى قىزمەت كورسەتۋ، قالىپتان تىس جاعدايلاردان شىعۋ جولدارى، العاشقى مەديتسينالىق قىزمەت كورسەتۋ شارالارىن ۇيرەتەدى. قازىرگى ۋاقىتتا ءبىلىم بەرۋ ورتالىعىندا مىڭ جولسەرىك پەن پويىز باسشىلارى بىلىمدەرىن جەتىلدىرىپ جاتىر»، - دەپ حابارلادى باسپا ءسوز قىزمەتىندەگىلەر.
