تارازدا قاسبەتى اشىلعان قۇران تۇرىندە سالىنعان جاڭا مەشىت اشىلدى - فوتو

تاراز. قازاقپارات - تارازدا وبلىس ورتالىعىنداعى يسلامنىڭ رۋحاني وشاعى قاتارىنا جاڭا مەشىت قوسىلدى.

قالانىڭ ورتالىق بولىگىندە، «قاراحان كەسەنەسى» ەجەلگى تاريح ەسكەرتكىشىنىڭ ماڭىندا سالىنعان مەشىت قازاق حاندىعىنىڭ 550 جىلدىعىنا ازىرلىك بارىسىندا قۇرىلعان «قاراحان اللەياسى» ساۋلەتتىك كەشەنىمەن ءساتتى ۇيلەسىم تاپتى. عيماراتتىڭ قاسبەتتىك بولىگىن ساۋلەتشىلەر بىرەگەي - اشىلعان قۇران كىتابى تۇرىندە ايشىقتاعان.

قازاقستان مۇسىلماندارى ءدىني باسقارماسىنىڭ وكىلى، ھيباتۋللا تارازي مەشىتىنىڭ باس يمامى دانيار جۇمابايەۆتىڭ ايتۋىنشا، قازىرگى كەزدە بۇكىل قازاقستانداعى سياقتى جامبىل وڭىرىندە دە يسلامنىڭ رۋحاني وشاعىنىڭ ءوسۋى ءۇردىسى بايقالادى.

«قاسيەتتى قۇراندى وقىپ-ۇيرەنۋ، يسلام ماسەلەسىندە ءبىلىمدى كۇشەيتۋ مۇسىلماندار ءۇشىن شىنايى يسلامدى جالعان اعىمداردان ايىرىپ، رۋحاني ءبىلىم الۋعا، ءدىني عۇرىپتاردى دۇرىس اتقارۋعا جول اشادى»، - دەدى تاراز ورتالىق مەشىتىنىڭ باس يمامى.

وبلىستىق ءدىن ىستەرى باسقارماسىنىڭ مالىمەتتەرىنە قاراعاندا، بۇگىندە وڭىردە 326 ءدىني بىرلەستىكتەر مەن فيليالدار ءوز جۇمىسىن جۇزەگە اسىرۋدا.

شامامەن 270 مىڭ جامبىلدىق مۇسىلماندار حانافي مازھابىنىڭ سۇننيتتىك جولىن ۇستانادى.

جامبىل وبلىسىنىڭ حالقى 1,107 ميلليون ادامدى قۇرايدى.