15:02, 21 - قاراشا 2015 | GMT +5
وتاندىق ماماندار و دۇنيەنى ناسيحاتتايتىن قۋىرشاقتاردان قورقۋ كەرەكتىگىن ايتتى
استانا. قازاقپارات - اقمولا وبلىسىنىڭ تۇتىنۋشىلار قۇقىعىن قورعاۋ دەپارتامەنتى قورقىنىشتى ويىنشىقتاردىڭ بالالار پسيحولوگياسىنا اسەر ەتەتىنىنە الاڭداۋلى، دەپ جازادى Today.kz دەپارتامەنت باسشىسى قايرات بايمۇحامبەتوۆكە سىلتەمە جاساي وتىرىپ
ونىڭ ايتۋىنشا، ويىنشىقتىڭ سەگىز ۇلگىسىنە ساراپتاما ناتيجەسىندە، «مونستر حاي»، «ماي مونستەر»، «ۆەبورەللا» جانە «ماگيك گەل» سياقتى قۋىرشاقتار بالانىڭ پسيحيكاسىنا كەرى اسەرىن تيگىزەتىنى انىقتالعان.
«بۇل ويىنشىقتار قورقىنىش تۋدىرادى، سالدارىنان الاڭداۋ مەن اگرەسسيا پايدا بولادى؛ قۇبىجىق بەينەلەرى زورلىق كورسەتۋگە بايلانىستى سيۋجەتتەردى ەسكە سالادى، و دۇنيەنى ناسيحاتتايدى، بۇل بالانىڭ ۇيقىسىن تىنىشىنان ايىرىپ، جاعدايىن تومەندەتەدى جانە بالادا سۋيتسيدالدى مىنەز-قۇلىق قالىپتاستىرادى»، - دەپ قورىتىندىلادى بايمۇحامبەتوۆ.
ساراپتاما قورىتىندىلارى وبلىستىڭ ءبىلىم بەرۋ مەكەمەلەرىنە جولداندى، جوعارىدا اتالعان ويىنشىقتاردىڭ بالاعا اسەرىن ءتۇسىندىرۋ ءۇشىن اتا-انالار جينالىسىن وتكىزۋ ۇسىنىلعان.
