الماتىدا «بوكسەر جولى» فيلمىنىڭ تۇساۋكەسەرى ءوتتى
كينونىڭ باس كەيىپكەرى - وزدىگىنەن ەرەجەسىز جەكپە- جەك تاسىلدەرىن ۇيرەنگەن قاراپايىم جاسوسپىرىم.
كۇندىز الماتىنىڭ «باراحولكاسىندا» نان تاپسا، كەشكە جاسىرىن تۋرنيرلەرگە قاتىسىپ جۇرگەن باس كەيىپكەر ۋاقىت وتە كەلە شارشى الاڭنىڭ ومىرىندە اسا ماڭىزدى ءرول وينايتىنىن تۇسىنەدى. ءبىراق ۇلكەن الاڭعا كوشەدەگى توبەلەستەردەن سىتىلىپ شىعۋ وڭايعا تۇسپەيدى.
بۇل كينو ەكى جىل بۇرىن جارىق كورۋى كەرەك ەدى. پرەمەرانىڭ نەگە كەش وتكەنىن «قازاقفيلم» كينوستۋدياسىنىڭ باسپا ءسوز قىزمەتىنىڭ جەتەكشىسى الماس جۇماعۇلوۆ ءتۇسىندىردى.
«فيلم 2013 - جىلى اياقتالدى. ءبىراق مونتاج بارىسىندا گەننادي گولوۆكين تۇسكەن كادرلار پايدالانىلدى. ءبىز فيلمدى بىردەن پروكاتقا جىبەرە المادىق. اۆتورلىق قۇقىق ماسەلەسىنە بايلانىستى. نۆو كانالى گەنناديدىڭ بارلىق جەكپە- جەكتەرىن ءتۇسىرۋ قۇقىعىنا يە عوي. ولارعا حات جىبەرىپ، جاۋابىن ۇزاق كۇتتىك. كەيىن پروموۋتەرلىك كومپانياعا حات جازىپ، ارنايى رۇقساتىن الدىق. سوسىن كەيبىر تەحنيكالىق ماسەلەلەر دە بوگەت بولدى»، - دەدى ا. جۇماعۇلوۆ.
باستى ءرولدى نازار شارحان وينادى. ول جاننا يسابايەۆانىڭ «ناعيما» فيلمىنەن بەلگىلى. جاڭا كينودا بەلگىلى اكتەرلەر ەرجان ءتۇسىپوۆ، ديماش احيموۆ، ەرىك جولجاقسىنوۆ، ەربولات توعىزاقوۆ، اينۇر ءىلياسوۆا رولدەردى سومدايدى.
كينوتۇسىرىلىم الماتىدا ءوتتى. بوكستان جاتتىعۋ كورىنىستەرى قازۇاۋ سپورت زالىندا ءتۇسىرىلدى.
اۆتور: گۇلميرا عوسمانالي
