ماقسات ءابدىقادىر ۇلىنىڭ «قازاق مەديتسيناسى» اتتى كىتابى جارىق كوردى
بۇل سۇبەلى عىلىمي ەڭبەك نەگىزگى ءۇش بولىمنەن تۇرادى.
ءبىرىنشى بولىمگە اۆتوردىڭ ناقتى دەرەك پەن دايەكتەر نەگىزىندە جازعان عىلىمي ماقالالارى، ەكىنشى بولىمگە ماماننىڭ اقىل-كەڭەستەرى، ءۇشىنشى بولىمگە بۇقارالىق اقپارات قۇرالدارىنا بەرگەن سىر-سۇحباتتارى توپتاستىرىلعان.
- مەديتسينا سالاسىندا ايانباي ەڭبەك ەتىپ، تەر توگىپ كەلە جاتقانىما 22 جىل بولىپتى. وسى ۋاقىت ارالىعىندا ءبىلىمدى دە بىلىكتى، ۇلاعاتتى دا ۇستامدى ۇستازداردان اقىل-كەڭەس الىپ، مول تاجىريبە جينادىم. ونى ناۋقاستاردى ەمدەۋ بارىسىندا كەڭىنەن پايدالاندىم. ءوزىم دە تىڭ تاقىرىپتار توڭىرەگىندە عىلىمي ەڭبەكتەر جازدىم. سولاردىڭ باسىن قوسىپ، جەكە جيناق ەتۋدىڭ ءساتى ەندى ءتۇستى. ەگەر وسى ەڭبەگىم سالا ماماندارىنىڭ ءھام ءوز دەنساۋلىعىنا بەي-جاي قاراي المايتىن ءدۇيىم حالىق، مۇقىم ەلدىڭ كادەسىنە جاراپ جاتسا، وندا ءۇمىتىمنىڭ اقتالعانى دەپ بىلەمىن، - دەيدى كىتاپ اۆتورى، بەلگىلى دارىگەر ماقسات ءابدىقادىر ۇلى.
«اۋىرىپ ەم ىزدەگەنشە، اۋىرمايتىن جول ىزدە» دەيدى دانا قازاق. سول ايتقانداي، بۇل كىتاپتى وقىعان ادام كەز كەلگەن اۋرۋدىڭ الدىن الۋعا بولاتىنىنا كوز جەتكىزەدى. سونىمەن بىرگە وزدىگىنەن ەمدەلۋدىڭ قاۋىپسىز جولدارىن ۇيرەنەدى. ءتىپتى اۋرۋدىڭ دياگنوزىن ادامنىڭ جۇزىنە، تىلىنە، كوزىنە قاراپ جانە تامىرىن ۇستاپ بولجاۋعا بولاتىنىن اۆتور عالىم رەتىندە عىلىمي نەگىزدە دالەلدەيدى. ەڭبەكتىڭ ەرەكشە اتاپ وتەر تۇسى دا وسىندا. بۇل عىلىمي ەڭبەك مەديتسينا سالاسىندا وقىپ جۇرگەن تالاپكەرلەرگە كوپ كومەگىن تيگىزەرى حاق.
«ايقىن»
