قازاق ادەبيەتى ارميان تىلىنە اۋدارىلا باستادى
بۇل يگى ءىستى ەريەۆان مەملەكەتتىك ۋنيۆەرسيتەتىنىڭ تۇركولوگتارى قازاقستاندىق ارىپتەستەرىمەن بىرىگە ازىرلەۋدە. ادەبي جيناقتىڭ ءبىر ەرەكشەلىگى - ول ارميان تىلىنە تىكەلەي ءتۇپنۇسقانىڭ وزىنەن اۋدارىلادى. سول ءۇشىن مۇنداعى جاستار قازاق ءتىلىن جەتىك مەڭگەرۋگە جاپپاي كىرىسكەن. الەكسانر سافاريان، ەريەۆان مەملەكەتتىك ۋنيۆەرسيتەتى، تۇركولوگيا كافەدراسىنىڭ مەڭگەرۋشىسى: - قازاق ادەبيەتى انتولوگياسىن باسىپ شىعارۋدى تەك ءبىز عانا قولعا العانبىز. جيناقتارعا احمەت ياسساۋيدەن باستاپ بارلىق قازاق اقىن- جىراۋلارىنىڭ، سونداي- اق الاشوردالىقتاردىڭ جانە ولجاس سۇلەيمەنوۆ سەكىلدى XX عاسىرداعى ايتۋلى اقىن- جازۋشىلار مەن قازىرگى زامان اۆتورلارىنىڭ ەڭبەكتەرى ەنگىزىلەدى. اۋدارمالاردىڭ ىشىندە فولكلور ۇلگىلەرى مەن احمەت بايتۇرسىن ۇلىنىڭ مىسال- ولەڭدەرى دە بار. بۇل تۋىندىلار بۇرىن- سوڭدى ارميان تىلىنە اۋدارىلماعان. الەكسانر سافارياننىڭ ايتۋىنشا، مۇنداي عىلىمي ەڭبەكتەر ارميان وقىرماندارىنا سوڭعى رەت كەڭەس وداعى كەزىندە عانا تانىستىرىلدى. ول كەزدەگى وقىرماندار ءۇشىن اباي قۇنانبايەۆ پەن مۇحتار اۋەزوۆتىڭ شىعارمالارى مىڭداعان دانامەن باسىلىپ شىققان. ال بۇل جيناقتىڭ العىسوزىنە تاريحي- فيلولوگيالىق ەسكەرتپەلەر جازىلادى. ونى ازىرلەۋ ءۇشىن ارميان عالىمدارى قازاقستاندىق ارىپتەستەرىمەن، دالىرەك ايتساق، گۋميليەۆ اتىنداعى ەۋرازيا ۇلتتىق ۋنيۆەرسيتەتى ۇستازدارىمەن بىرگە ەڭبەك ەتىپ جاتىر.
