عالىمدار: بالىق جەۋ ادام ءومىرىن ۇزارتادى

استانا. قازاقپارات -  ا ق ش عالىمدارى 16 جىل بويى جۇرگىزگەن زەرتتەۋ قورىتىندىسىن جاريالادى. وعان سايكەس، بالىق جەۋ ادام ءومىرىن ۇزارتاتىن بولىپ شىقتى.

 وسىعان بايلانىستى جۇرگىزىلگەن سىناققا 65 جاستان اسقان ءۇش مىڭ ەرىكتى قاتىسىپتى. قاريالار تاجىريبە بارىسىندا ۇنەمى دارىگەرلىك تەكسەرۋدەن ءوتىپ وتىرعان. مەديكتەر ولاردىڭ قان قىسىمىن ولشەپ، ساراپتاما ءۇشىن قاتىسۋشىلاردان قان العان. اناليز ناتيجەلەرى قاتىسۋشىلاردىڭ جەگەن تاعامدارىمەن سالىستىرىلعان.

عالىمداردىڭ ايتۋىنشا، بالىق جەۋ اعزاعا وڭتايلى اسەر ەتىپ، ادام ءومىرىن ورتاشا ەسەپپەن 2,2 جىلعا دەيىن ۇزارتادى. سونداي- اق سىناق بارىسىندا بالىقتى ءجيى جەگەن قاتىسۋشىلار جۇرەك اۋرۋلارىنان سيرەك اۋىرىپ، ولاردىڭ اراسىندا بۇل اۋرۋدان قايتىس بولۋ دەرەگى %30- عا كەمىگەن. وڭتايلى اسەرى بولۋ ءۇشىن بالىق ونىمدەرىن اپتاسىنا 2 رەت جەگەن ءجون، دەپ جازادى informing.ru.