قازاقستاندىق سپورتشى الەم چەمپيوناتىندا جاڭا رەكورد ورناتتى

استانا. قازاقپارات - پاۆلودارلىق نيكولاي زەمسوۆ پورتۋگاليادا ەرلەر اراسىندا كلاسسيكالىق پاۋەرليفتينگتەن(پاۋەرليفتينگ - كۇشتىك ءۇشسايىس دەپ اتالاتىن اۋىر اتلەتيكانىڭ ءبىر ءتۇرى، شتانگانى جۇرەلەپ كوتەرۋ، جاتىپ الىپ سىعىمداپ كوتەرۋ، شتانگىنى تارتۋ - رەد.) وتكەن الەم چەمپيوناتىندا ەكى التىن ۇتىپ، جاڭا الەمدىك رەكورد ورناتتى، دەپ حابارلايدى pavlodarnews.kz.

 وبلىستىق سپورت جانە دەنە شىنىقتىرۋ باسقارماسى باسپا ءسوز قىزمەتىنىڭ حابارلاۋىنشا، جارىس 10-15 -قاراشا ارالىعىندا پورتۋگاليانىڭ پورتۋ قالاسىندا وتكەن.

«نيكولاي زەمسوۆ مۇسىندىك تارتۋ مەن سوممادا وزىنە تەڭ كەلەر ەشكىم جوق ەكەنىن دالەلدەدى. مۇسىندىك تارتۋدا 326 كەلىلىك شتانگانى كوتەرىپ، الەمدىك رەكورد جاسادى»، - دەيدى سپورتشىنىڭ باپكەرى ق ر ەڭبەك سىڭىرگەن سپورت شەبەرى يۆان پروكوپەنكو.

الەم بىرىنشىلىگىندە ن. زەمسوۆ جۇرەلەپ وتىرىپ كوتەرۋ كەزەڭىندە 250، شتانگىنى جاتىپ الىپ سىعىمداپ كوتەرۋدە 185، ال شتانگىنى تارتۋ كەزەڭىندە 326 كەلىنى ەڭسەرگەن.