قىتايدا تۇڭعىش رەت «قازاقستان ورتالىعى» اشىلدى - فوتو
ورتالىقتىڭ رەسمي اشىلۋىنا قازاقستاننىڭ قىتاي حالىق رەسپۋبليكاسىنداعى ەلشىسى شاحرات نۇرىشيەۆ پەن «حالىقارالىق باعدارلامالار ورتالىعى» ا ق- نىڭ پرەزيدەنتى عاني نىعىمەتوۆ قاتىستى.
«مەنىڭ ويىمشا، بۇل ورتالىق قىتايدىڭ قازاقستانعا دەگەن مۇددەسىن، قازاق ءتىلى مەن قازاقتىڭ مادەنيەتىنە، تولەرانتتىلىقتىڭ قازاقستاندىق ۇلگىسى مەن ەلىمىزدىڭ ەكونوميكالىق دامۋىنا دەگەن قۇرمەتىن تانىتادى. «قازاقستان ورتالىعىن» قۇرۋ تۋرالى يدەيا شاڭحايدا جۇزەگە اسقانى زور مانگە يە، سەبەبى، قىتاي ازياداعى قارجى مەن تەحنولوگيانىڭ ءىرى ورتالىعى، ال، شاڭحاي قىتايداعى ۇلكەن مەگاپوليس»، - دەدى ورتالىقتىڭ رەسمي اشىلۋىندا ش. نۇرىشيەۆ.
ەلشى وسى ورتالىق شەتەلدىك ستۋدەنتتەر مەن قىتاي حالقى ءۇشىن قازاقستاننىڭ مادەنيەت پەن تاريح سالالارىنداعى، ىشكى جانە سىرتقى ساياساتىنداعى جاڭالىقتاردىڭ ورتالىعى بولاتىنىن ايتا كەلە، جاڭا نىسانعا «بىزدەر مەن سىزدەر: قىتاي مەن قازاقستاننىڭ تاريحى» اتتى كىتاپتى تارتۋ ەتتى.
جالپى، «قازاقستان ورتالىعىنىڭ» بازاسىندا ق ر پرەزيدەنتى ن. نازاربايەۆتىڭ «ماڭگىلىك ەل»، «نۇرلى جول»، «قازاقستان-2050» ستراتەگياسى، «100 ناقتى قادام» ۇلت جوسپارى سياقتى باعدارلامالاردى ءتۇسىندىرۋ جۇمىستارى جۇرگىزىلەدى. سونداي- اق، شاڭحايدىڭ جوعارعى وقۋ ورىندارىندا ءبىلىم الىپ جاتقان قازاق ستۋدەنتتەرىنىڭ (ولاردىڭ سانى 800 گە جۋىقتايدى) باس قوسىپ، پىكىر الماساتىن ورتالىعى بولماق. باسا ايتا كەتەرلىگى، جۋىق ارادا ورتالىق ىشىنەن شەتەلدىك ستۋدەنتتەر ءۇشىن قازاق ءتىلىن ۇيرەتەتىن كافەدرا اشىلادى.
