ق ر پرەزيدەنتى: ۇلتتىق بانك قازاقستاندىقتاردىڭ تەڭگەگە دەگەن سەنىمىن قايتا ورنىقتىرۋ ءۇشىن شارالار قابىلداۋ ءتيىس
بۇل تۋرالى اقوردانىڭ باسپا ءسوز قىزمەتىنەن حابارلادى.
كەزدەسۋ بارىسىندا ۇلتتىق بانكتىڭ قازىرگى قىزمەتىنە جانە اقشا- نەسيە ساياساتىنا، ەلدەگى قارجى تۇراقتىلىعىن قامتاماسىز ەتۋ ىسىنە، سونداي- اق بانكتەردىڭ ەكونوميكانىڭ ناقتى سەكتورىن نەسيەلەۋىنە بايلانىستى ماسەلەلەر تالقىلاندى.
نۇرسۇلتان نازاربايەۆ ۇلتتىق بانك قازاقستاندىقتاردىڭ تەڭگەگە دەگەن سەنىمىن قايتا ورنىقتىرۋ ءۇشىن شارالار قابىلداپ، ەكونوميكانى دوللارسىزداندىرۋ جۇمىستارىن جالعاستىرۋى تيىستىگىن اتاپ ايتتى.
«ۇلتتىق ۆاليۋتانىڭ ەركىن باعامى جاعدايىندا حالىققا توتەنشە ەشتەڭە بولىپ جاتپاعانىن ءتۇسىندىرۋ قاجەت. تەڭگەگە ەنەرگيا تاسىمالداۋشى ونىمدەردىڭ باعاسىنىڭ تومەندەۋى ىقپال ەتۋدە، بۇل - تابيعي ۇدەرىس. سونىمەن قاتار، ينفلياتسيا دەڭگەيىن، حالىقتى الەۋمەتتىك ماڭىزى بار تاۋارلارمەن قامتاماسىز ەتۋ ءىسىن قاداعالاپ، الەۋمەتتىك ءالسىز توپتارعا كومەك كورسەتۋ جاعىن قاراستىرۋ كەرەك. وبلىس اكىمدەرى وسى ماسەلەلەردى باقىلاۋى ءتيىس»، - دەدى قازاقستان پرەزيدەنتى.
ۇلتتىق بانك ءتوراعاسى قازاقستاننىڭ الەمدىك قارجى جانە تاۋار نارىقتارىنداعى قازىرگى احۋالمەن ساناسۋعا ءماجبۇر ەكەنىن ايتتى.
«بۇل جاعدايدا بىزگە تيىسىنشە اقشا- نەسيە ساياساتىن جۇرگىزىپ، يكەمدى باعام قالىپتاستىرۋ قاجەت. ەڭ باستىسى - قازىر نە بولىپ جاتقانىن قوعامعا ءتۇسىندىرۋ»، - دەدى د. اقىشيەۆ.
كەزدەسۋ قورىتىندىسى بويىنشا مەملەكەت باسشىسى ءبىرقاتار ناقتى تاپسىرما بەردى.
