پاۆلودار وبلىسىندا بەس بالا سىناپ بۋىمەن ۋلانىپ قالعان
ولاردىڭ بارلىعى - تۋعان اعايىندىلار، دەپ حابارلايدى pavlodarnews.kz.
پاۆلودار وبلىستىق ءى ءى د- نىڭ باسپا ءسوز حاتشىسى بايان ماعزۇموۆانىڭ حابارلاۋىنشا، بالالاردىڭ اكەسى ۇزاق مەرزىم بويى قاتەرلى ىسىكتى سىناپپەن ەمدەپ كەلگەن.
«تۋعان- تۋىسقاندارى تانىستارىنىڭ كەڭەسى بويىنشا ونكولوگيالىق اۋرۋعا شالدىققان ەر ازاماتتى سىناپ بۋىمەن ەمدەگەن. ول ءبىر اي بويى سىناپتى ءۇش رەت قايناتقان. سول كەزدە ۇيدە بالالار دا بولعان. حيميالىق زات سىناپ باعاناسىنان الىنعان. دەرتكە شالدىققان ادام كوز جۇمدى. ونىڭ 44 جاستاعى اعاسى پوليتسيا الدىندا تۇسىنىكتەمە بەردى. قىلمىستىق ءىس ق ر قىلمىستىق كودەكسى 114-بابىنىڭ 4-بولىگى بويىنشا قوزعالدى. اتالمىش ءىس بويىنشا تەرگەۋ جۇمىستارى جالعاسۋدا. ءىس سوتقا دەيىن جەتسە، زارداپ شەككەن وتباسىنىڭ تۋىسىنا ەكى جىلعا دەيىن باس بوستاندىعىنا شەكتەۋ قويۋ جانە 2000 ا ە ك دەيىن ايىپپۇل سالىنۋى مۇمكىن»، - دەيدى ب. ماعزۇموۆا.
دارىگەرلەردىڭ مالىمەتىنشە، بالالار اۋرۋحاناعا ءالسىز كۇيدە ءتۇسىپ، سۇيەكتەرىنىڭ قاتتى اۋىرعانىنا شاعىمدانعان.
«بالالاردىڭ بارلىعى انتيدوتتى تەراپيا الادى. ولاردىڭ بيولوگيالىق سۇيىقتىعى - قان، نەسەپ جانە شاشى قاراعاندى قالاسى ەڭبەك جانە كاسىبي پاتولوگيا ۇلتتىق گيگيەنا ينستيتۋتىنا جىبەرىلدى. ساراپتامالارمەن جۇمىس جاسالۋدا. قورىتىندىسى بويىنشا ناقتى دياگنوز قويىلادى. ۋلانۋ مولشەرى انىقتالدى»، - دەيدى وبلىستىق بالالار اۋرۋحاناسى سوماتيكالىق ءبولىمىنىڭ مەڭگەرۋشىسى ولگا كيم.
