قازاقستان ونەرتاپقىشتارى بالانىڭ قاۋىپسىزدىگىنە ارنالعان ەرەكشە قۇرىلعىنى جاساپ شىعاردى
بۇل تۋرالى «قازاقپارات» تىلشىسىنە بەرگەن سۇحباتىندا «Mongoose» كومپانياسىنىڭ مەنەدجەرى يرينا يماناسوۆا ءمالىم ەتتى.
«بۇل قۇرىلعى شاعىن عانا جانە سالماعى دا جەڭىل. ونى بالانىڭ كيىمىنە ەش قيىندىقسىز بەكىتۋگە بولادى. قۇرىلعى تەلەفونعا موبيلدىك قوسىمشا ارقىلى قوسىلىپ، كەيىننەن بالانىڭ جۇرگەن جەرى تەلەفوندا كورىنىپ تۇرادى.
نارىقتاعى « gps ترەكەرلەردەن» ايىرماشىلىعىنا توقتالاتىن بولساق، ءبىزدىڭ قۇرىلعى بالانىڭ جۇرگەن جەرىن دالادا عانا ەمەس، سونىمەن قاتار جەرتولەدە، ساۋدا ورتالىقتارىندا، جالپى بارشا الەمدە ەش كەدەرگىسىز انىقتاي الادى. وسى قۇرىلعىعا الدىن الا تولەنگەن روۋمينگ ەنگىزىلگەن، سوندىقتان الەمنىڭ كەز كەلگەن نۇكتەسىنەن بالانىڭ تۇرعان جەرىن كورە الاسىزدار»، - دەدى ي. يماناسوۆا.
ونىڭ سوزىنە قاراعاندا، «مانگۋست» قۇرىلعىسى اككۋمۋلياتورىنىڭ قۋاتى 20 كۇنگە دەيىن جەتەدى.
«ونىڭ تاعى ءبىر ەرەكشەلىگى - قۇرىلعى سۋ وتكىزبەيدى جانە وڭايلىقپەن سىنا قويمايدى. «مانگۋست» بالانىڭ تۇرعان جەرىن انىقتاۋدان بولەك، ونىڭ كۇندەلىكتى ءجۇرىس- تۇرىسىن، ادەتىن ەستە ساقتايدى، بالاقاي جەردە قاشان بولاتىنىن جۇيەگە ەنگىزەدى. ەگەر دە داعدىلى كۇن تارتىپتەن اۋىتقۋلار بولسا، ياعني مەكتەپتەن شىعاتىن ۋاقىتتان ەرتەرەك مەرزىمدە بالانى بىرەۋ كولىكپەن ساعاتىنا 100 شاقىرىم جىلدامدىقپەن الىپ كەتسە، وندا اتا- اناسىنىڭ موبيلدىك قوسىمشاسىنا ارنايى ەسكەرتۋ كەلەدى»، - دەدى كومپانيا مەنەدجەرى.
بەلگىلى بولعانداي، قازاقستاندا شىعارىلاتىن بۇل قۇرىلعىلاردىڭ ءوندىرىسى الداعى جىلدىڭ باسىندا ىسكە قوسىلادى دەپ كۇتىلۋدە.
اۆتور: رۋسلان عابباسوۆ
