اتاقتى جامبىلدىڭ اقىن نەمەرەسى ءالىمقۇل جامبىلوۆ دۇنيەدەن وزدى

استانا. قازاقپارات - جامبىلدىڭ اقىندىق ونەرى دارىعان نەمەرەسى، الىپ بايتەرەكتىڭ ماۋەلى ءبىر بۇتاعى، قازاقستاننىڭ حالىق اقىنى، قازاقستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى، «قۇرمەت بەلگىسى» وردەنىنىڭ يەگەرى، الماتى وبلىسىنىڭ جانە جامبىل اۋدانىنىڭ قۇرمەتتى ازاماتى ءالىمقۇل جامبىلوۆ 2015 -جىلدىڭ 14-قاراشاسىندا 88 جاسىندا دۇنيەدەن وزدى.

ءالىمقۇل جامبىلوۆ 1927 -جىلدىڭ 9- مامىرىندا الماتى وبلىسى، جامبىل اۋدانىنىڭ جامبىل اۋىلىندا دۇنيەگە كەلگەن. التى ايلىعىندا جەتىم قالعان ءالىمقۇل جاسىنان جامبىل اتاسىنىڭ جانىندا ءجۇرىپ، ءتالىم-تاربيە الدى جانە ولەڭدەرىن جاتقا ايتىپ ءوستى. 1944 -جىلى جامبىل ورتا مەكتەبىن، 1947 -جىلى كينواكتەر مەكتەبىن بىتىرگەن. 1947-1948 -جىلدارى اۋداندىق مادەنيەت بولىمىندە، 1952-1994 -جىلدار ارالىعىندا باسپا ءسوز سالاسىندا جاۋاپتى قىزمەتتەر اتقاردى.

جامبىلدىڭ اسىل مۇراسىمەن جاسىنان سۋسىنداپ، ونى كورىپ-ءبىلىپ، تىڭداپ وسكەن - ءالىمقۇل قازاقتىڭ اقپا-توكپە اقىندىق ءداستۇرىن قايماعىن بۇزباي جالعاستىرۋشىلاردىڭ ءبىرى. ول م. كوكەنوۆ، ءا. سارىبايەۆ، ن. لۋشنيكوۆا سىندى تانىمال ايتىسكەرلەرمەن ايتىسقا تۇسكەن. الەكەڭ ەل مەن جەر تاريحىن، اۋىل تۇرمىسىن جىرعا قوسقان ايتۋلى ءسوز شەبەرى. اقىننىڭ سۇيسىنە جىرلايتىن تاقىرىبى ەل مەن جەردىڭ جەتىستىگى، اسىرەسە، اۋىلداستارىنىڭ قاجىرلى ەڭبەگى ەدى. ول قازاقتىڭ الىپ تۇلعالى باتىرلارىن، پالۋاندارىن، ۇلى وتان سوعىسىنىڭ ارداگەرلەرىن، ەڭبەك ارداگەرلەرىن، تاريحي تۇلعالاردى كەيىنگى ۇرپاق ساناسىندا قالدىرۋدى وزىنە پارىز ساناپ، ولەڭ- جىرلارىن ارنادى. اقىن جاستارعا، بالالارعا ارناپ اقىل- ناقىل، وسيەت ولەڭدەر قالدىردى. جامبىلعا، كەنەنگە، ۇمبەتالىگە، تۇرماعانبەتكە ارناعان تولعاۋ- جىرلارى بار.

اقىننىڭ «قىزىل سىرلى دومبىرا»، «مەن ءالىمقۇل، جامبىلدىڭ نەمەرەسى»، «اتادان قالعان ءبىر مۇرا»، «جامبىل قالاسىندا» اتتى جىر جيناقتارى جارىق كورگەن. الەكەڭنىڭ جارقىن ەستەلىكتەرى- بولاشاققا قالعان اسىل مۇرا.

ءالىمقۇل اقىن - اتاسى جامبىلدىڭ بيىككە كوتەرگەن جىر جالاۋىن قولدان تۇسىرمەي، جوعارى ۇستاپ، اقىندار مەن باتىرلار ەلىنىڭ جىر بۇلاعىنان سۋسىنداپ، ءسۇيىنباي جىرىن سەلدەتىپ، جامبىلدىڭ جىرىن تەربەتىپ اقىندىق ونەردە وزىندىك قولتاڭباسىن قالدىردى.

جاسىمنان مەن جاقسىعا جاقىن ءجۇرمىن،

داريا شالقار كولدەي تاسىپ ءجۇرمىن،

ايتىسىپ، ولەڭىمدى شاشىپ ءجۇرمىن، -

دەپ ون سەگىز جاستان اسقانشا اتاسىنىڭ جانىندا جۇرگەن، ۇلى جامبىل اقىننىڭ اسىل جالعاسى الەكەڭنىڭ ايتار اڭگىمەسى ءالى دە كوپ ەدى.

قولىنا قىزىل سىرلى دومبىراسىن الىپ، قىران قۇستاي قومدانىپ، ولەڭ-جىردى نوسەرلەتكەن - اسىلدىڭ سىنىعى، تۇلپاردىڭ تۇياعى، سۇڭقاردىڭ قاناتى ءالىمقۇل جامبىلوۆتىڭ جارقىن بەينەسى ماڭگى ەستە ساقتالادى.

جانازاسى 16 -قاراشا كۇنى، ساعات: 10.00 دە جامبىل اۋىلىندا، قوناقاسى ۇزىناعاش اۋىلىنداعى «تالعات» مەيرامحاناسىندا بەرىلەدى.

Kaznews.kaztrk.kz