بىشكەكتە شوقان ءۋاليحانوۆ پەن بورانباي ءبيدىڭ مەرەيتويىنا ارنالعان شارا ءوتتى - فوتو
شارانى تۇركى اكادەمياسى حالىقارالىق ۇيىمى قىرعىز رەسپۋبليكاسى مادەنيەت، اقپارات جانە تۋريزم مينيسترلىگىنىڭ قولداۋىمەن ۇيىمداستىرىلعان، دەپ حابارلايدى اكادەميانىڭ باسپا ءسوز قىزمەتىنەن.
بىشكەكتەگى ا. مالدىبايەۆ اتىنداعى قىرعىز ۇلتتىق اكادەميالىق وپەرا جانە بالەت تەاترىندا بولعان «شوقان ءۋاليحانوۆ جانە بورانباي ءبي. توعىسقان تاعدىرلار» اتتى جيىندى وسى ەلدىڭ ۇلتتىق عىلىم اكادەمياسىنىڭ پرەزيدەنتى ابدىعانى ەركەبايەۆ اشىپ، قىرعىز رەسپۋبليكاسىنىڭ مادەنيەت، اقپارات جانە تۋريزم ءمينيسترى التىنبەك ماقسۇتوۆ قۇتتىقتاۋ ءسوز سويلەدى.
ءوز كەزەگىندە ءسوز العان تۇركى اكادەمياسى حالىقارالىق ۇيىمىنىڭ پرەزيدەنتى دارحان قىدىرالى بۇل شارانىڭ باۋىرلاس قوس ەلدىڭ تاريحي جانە مادەني ىنتىماعىن ارتتىرۋداعى ماڭىزىن اتاپ ءوتتى. «ءتۇبى ءبىر تۋىس حالىقتار اراسىنداعى بايلانىستاردى تەرەڭدەتۋگە، تۇركى ينتەگراتسياسىنىڭ نىعايۋىنا جانە ادەبيەت سالاسىنا سىڭىرگەن ولشەۋسىز ەڭبەگى ءۇشىن» وسموناكۋن يبرايموۆتى تۇركى اكادەمياسىنىڭ قۇرمەت گراموتاسىمەن جانە جانكوروز كانيمەتوۆتى «تۇعىرلى تۇلعالاردى ۇلىقتاۋدا قوسقان زور ۇلەسى ءۇشىن» العىس حاتىمەن ماراپاتتادى.
قىرعىز رەسپۋبليكاسىنىڭ پرەزيدەنت اپپاراتى، ق ر جوعارعى كەڭەسى مەن قىرعىز ۇكىمەتىنىڭ وكىلدەرى، مەملەكەت جانە قوعام قايراتكەرلەرى مەن كورنەكتى عالىمدار قاتىسقان ايتۋلى شاراعا قازاقستان تاراپىنان ءبىر توپ مارتەبەلى دەلەگاتسيا قاتىستى.
اتاپ ايتقاندا، تۇركى مەملەكەتتەرى كەڭەسىنىڭ اقساقالدار كەڭەسىنىڭ مۇشەسى، پروفەسسور ءادىل احمەتوۆ، ق ر ۇ ع ا اكادەميگى، ت. ع. د. بولات كومەكوۆ، «مادەني مۇرا» جۋرنالىنىڭ باس رەداكتورى جارىلقاپ بەيسەنباي ۇلى قوس تۇلعا جايىندا بايانداما جاسادى.
بۇدان بولەك، وسى سالتاناتتى شارا اياسىندا شوقاننىڭ ءوزى سالعان سۋرەتتەرى مەن كىتاپتار كورمەسى ۇيىمداستىرىلدى.
