ىقىلاس وجاي ۇلى: ادەبيەت - وي جارىسىنىڭ الامانى
عاسىردىڭ ءوتىمدى ءھام وكپەك جەلى ءسوزدى سارعايتادى، كەمىكتەيدى، ءتۇسىن وڭدىرادى. جەمىر ۋاقىتتىڭ جەلى مەن جاڭبىرىنا تەك ءبىر عانا نارسە شىداس بەرەدى. ول - وي. وي بولعاندا كەمەڭگەر وي. ءبىزدىڭ پروزا مەن پوەزيا دەپ جۇرگەنىمىز سۋ تاتىعان ءسوز تىركەستەرى مە، الدە جاسامپاز يدەيا ما، ماسەلە سوندا بولىپ تۇر. وي دەگەنىمىز - تانىم. تانىمى وزگەرگەن ەلدىڭ تاعدىرى دا (ءومىرى ) وزگەرەدى.
پروزانى پۋبليتسيستيكامەن شاتاستىرىپ، پوەزيانى ۇلتقا ۋاعىز ايتۋدىڭ مىنبەرى دەپ تۇسىنەتىن ءمۇشايرالىق ءمۇساپىر حالىمىزبەن وركەنيەتتى ادەبيەت جايىندا ارمانداۋىمىزدىڭ ءوزى دە ۇيات. بۇل ەندى ۇشاقتى اتپەن قۋىپ جەتۋگە بولادى دەگەن سەكىلدى قيالي قيسىن عانا. اگرارلىق سانانىڭ حان بازارى تارقاعانى قاشان. كيىز ءۇي تىگىلگەن كەڭ جايلاۋدى جىرلاپ، شىركىن كوڭ مەن تەزەكتىڭ ءيسىن- اي دەپ وتىراتىن ۋاقىت الدەقاشان وتكەن. باسقالار بولسا، ادام جانىنىڭ الۋان قاتپارلى مەگاتاقىرىپتارىن يگەرەمىز دەپ ماڭدايلارىن ۋقالاپ الەك.
زامانا تاجىريبەسىنە سۇيەنسەك، ادەبيەت - وي جارىسىنىڭ الامانى. وي ويلاۋدىڭ شاق پەن شەكاراسى بولماعاندىقتان، ادەبيەت - ءيسى ادامزاتقا ورتاق ونەر. ولاي بولسا، ءبىز الەمدىك وي بايگەسىندە نەشىنشى ورىنعا يەلىك ەتتىك، الدىمىزدا كىمدەر كەلەدى؟ كوزدەن كوكىرەك (حيكمەت) كاتەگورياسىنا كوتەرىلە الدىق پا، مىنە، قازىرگى قازاق ادەبيەتى وسى ساۋالدار توڭىرەگىندە جاۋاپ ىزدەۋى ءتيىس. باستىسى، رۋحاني يننوۆاتسيا ساناتىنداعى كەمەڭگەر وي تۋراسىندا.
«ادەبيەت پورتالى»
