قىرعىزستاندا جۇرگىزۋشىلەر مادەنيەتسىزدىگىنەن جول اپاتتارى جيىلەگەن

استانا. قازاقپارات - الداعى بىرەر جىلدا كورشىلەس قىرعىز ەلى جولدارى ەڭ قاۋىپتى مەملەكەتتەردىڭ كوشىن باستاۋى مۇمكىن.

ستاتيستيكاعا سەنسەك، ەلدە اپاتقا ۇشىراعان جۇرگىنشىلەردىڭ %46 ى اجال قۇشادى ەكەن. ماماندار بۇل رەتتە بيلىككە شۇعىل شارا قولدانۋدى ۇسىنىپ وتىر. الايدا ەلدە بار ءتارتىپتى ىسكە اسىرۋدىڭ ءوزى قيىنعا سوعىپ وتىرعان سىڭايلى.

قىرعىز ەلىندە جول قاۋىپسىزدىگى ماسەلەسىنىڭ جۇگەنسىز كەتكەنىن وسىدان ەكى جىل بۇرىن دۇنيەجۇزىلىك دەنساۋلىق ساقتاۋ ۇيىمى بايقاعان ەدى. نەبارى 6 ميلليون حالقى بار مەملەكەتتە جىل سايىن مىڭداعان ادام اپات قۇربانىنا اينالادى. كولىك سانى 1 ميلليوننان اسىپ كەتكەنىن ەسكەرسەك، ول كورسەتكىش بارعان سايىن ارتا بەرۋى مۇمكىن. وسىدان سوڭ ساراپشىلار ەل بيلىگىنە قاۋىپسىزدىككە جاۋاپتى مەكەمەلەردىڭ جۇمىسىن ۇيلەستىرۋدى ۇسىنىپ وتىر.

چينارا كاسمامبەتوۆا، «قاۋىپسىز قوزعالىس» بىرلەستىگىنىڭ ديرەكتورى:

- جول- پاترۋلدىك قىزمەتىنىڭ كوپتەگەن فۋنكتسياسى وزگە مينيسترلىكتەرگە ءبولىنىپ بەرىلگەننەن كەيىن ولاردىڭ جۇمىستارىن باقىلاپ، رەتتەپ، ۇيلەستىرىپ وتىراتىن مەكەمە كەرەك. ايتپەسە ءبىز بۇل ماسەلەدەن ناتيجە شىعارا المايمىز.

كوشەدەگى وقۋشىلاردىڭ قاۋىپسىزدىگى دە قىرعىز اعايىندى الاڭداتىپ وتىر. جولدارداعى ءتارتىپتى ساقشىلار بارىنشا قاداعالاعانىمەن، جايسىز جاعدايلار كوپتەپ كەزدەسەدى. دەمەك، كولىك يەلەرى مادەنيەتىنىڭ تومەندىگى مەن ايىپتىلارعا قاتىستى جازانىڭ جۇمساقتىعى بالالاردىڭ ءومىرىن دە قاتەرگە تىگىپ وتىر.

بەگىماي اقنازاروۆا، «مەكتەپكە قاۋىپسىز جول» جوباسىنىڭ ۇيلەستىرۋشىسى:

- قازىر ءبىز بار نازارىمىزدى وسى ماسەلەگە اۋداردىق. جول پاترۋلدەرى بۇلدىرشىندەردىڭ ومىرىنە قاۋىپ تونگەن جاعدايلاردى كۇن سايىن حابارلاپ وتىرادى. ءبىراق كوپ ايتقانىمىزبەن، ازىرگە قولىمىزدان كەلەر قايىر از.

قىرعىزستاندا جول قوزعالىسىنىڭ قاۋىپسىزدىك ستراتەگياسى قابىلدانعان. تاجىريبە كورسەتكەندەي، بۇگىنگە دەيىن ول كولىك اپاتىنىڭ ازايۋىنا ەش اسەر ەتپەدى. مامانداردىڭ پىكىرىنە سەنسەك، بۇعان مەملەكەتتىك ورگانداردىڭ ستراتەگيانى جۇزەگە اسىرۋعا جەڭ استىنان قارايتىنى سەبەپ بوىپ وتىر.

تۇردە www.24.kz