كوك تۇرىك باتىرى ولگەندە ايەلىنىڭ ايتقان جوقتاۋى
ماڭدايىمداعى
جۇلدىزىم ءسوندى.
ارىستانىم جىعىلدى.
ارىسىم ءولدى.
نەدەن مەرت بولدىڭ باتىرىم؟
زۋلاپ ۇشقان جەبەنى
اۋادا ۇستاپ اپ
تىزەگە ساپ
سىندىراتىنىڭ قايدا؟ !
جاۋىڭدى
كوجەكتەي القىمىنان سىعىپ
تۇنشىقتىرىپ
تىندىراتىنىڭ قايدا؟ !
جولبارىستى
قۇيرىعىنان ۇستاپ
باسىڭنان اسىرىپ
لاقتىراتىن ەدىڭ.
ىشىڭدەگى وتتىڭ قىزۋىنان -
الاسۇرىپ! -
اپتىعاتىن ەدىڭ.
ورتەنىپ كەتتىڭ بە؟ !
جاتساڭ - توبەدەي،
تۇرساڭ ەمەندەي ەدىڭ.
تاسقىن اسا الماس
كولدەگى كەمەردەي ەدىڭ.
نەدەن مەرت بولدىڭ، باتىرىم؟
ەلىڭ ەگىلىپ تۇر، -
كوزدەن اققان جاستارى
نوسەر بوپ توگىلىپ تۇر.
بايتەرەككە بايلاپ قويعاندا
بايتەرەكتى قوپارىپ
ارقالاپ كەتەتىنىڭ قايدا؟ !
تەمىر تورلاردى
اعاشتاي سىندىرىپ،
وتىنداي بۇتارلاپ
جاڭقالاپ كەتەتىنىڭ قايدا؟ !
نەدەن مەرت بولدىڭ، باتىرىم؟
اقىلىڭ
ءىنجۋ- مارجانعا تولى
ساندىقتاي ەدى.
اقىرىپ شىققان داۋىسىڭ
جاپىرىپ جىبەرەتىن
قاعان ايتقان
جارلىقتاي ەدى.
التاي تاۋعا
قارا بۇلتتار اعىلدى.. .
شىناردان يگەن شاڭىراعىڭ
قارا جامىلدى.
نەدەن مەرت بولدىڭ، باتىرىم؟
سەنىڭ التىن قۇتىڭنىڭ قۋاتىن
كۇمىس قۇرساعىما قۇيىپ،
ارىستاننىڭ جۇرەگىمەن
جەرىگىمدى باسىپ
ون بالا تاپتىم.
بايلىققا كەنەلدىم،
باقىتقا باتتىم.
سول ون بالاڭدى
جاۋىڭا
ەرتەڭ اتتاندىرام.
سەنىڭ كەگىڭدى الادى!
كەگىڭدى الماسا
سول جەردە ءولىم تابادى!
ومىرەم قابادى!
تەمىرحان مەدەتبەك
