تۇركيالىقتار «قازاق ەلى» سەريالىن كورگىسى كەلەدى

استانا. قازاقپارات -جاقىندا عانا جارىق كورگەن «قازاق حاندىعى» تۋرالى سەريالدىڭ پرومو روليگى تۇركيالىقتاردى دا قىزىقتىرا باستادى.

TRT AVAZ كانالىنىڭ Facebook-تەگى پاراقشاسىنا پىكىر قالدىرعان تۇرىكتەر سەريالدى تۇرىك تىلىندە دە كورگىسى كەلەتىندىكتەرىن جازعان.

 ال، ءبىرقاتار تۇرىك اقپارات قۇرالدارى قازاق حاندىعى تۋرالى سەريالدىڭ بيۋدجەتى 50 ميلليون دوللار دەگەن اقپارات تاراتتى.

قازاق حاندىعىنىڭ 550 جىلدىعىنا ارنالعان سەريالدىڭ بيۋدجەتىنىڭ قوماقتى ەكەندىگىن تۇركيانىڭ «دجيحان» اقپارات اگەنتتىگى دە، ەلدەگى ەڭ بەدەلدى اقپاراتتىق سايتتاردىڭ ءبىرى haberler.com سايتى دا جازدى. الايدا، وتاندىق اقپارات قۇرالدارىندا ونداي دەرەك جوق. تەك ءاۋ باستا سەريال ءۇشىن 5 ميلليون دوللار قاراستىرىلعانى ايتىلعان. كەيىن قارجىنىڭ ءبىرازى قىسقارىپ كەتسە كەرەك. ءتۇرلى الىپ- قاشپا اڭگىمەلەردىڭ تۋىنداۋىنا دا وسى قارجى ماسەلەسى سەبەپ بولعان ەدى.

تۇركيانىڭ مەملەكەتتىك TRT ارناسى كورسەتىپ جاتقان «ءتىرىلۋ. ەرتۇعرىل» سەريالىنىڭ بيۋدجەتى دە قوماقتى ەكەندىگىن ايتىلاتىن. الايدا، قازاق حاندىعى تۋرالى سەريالدىڭ 50 ميلليون دوللارلىق بيۋدجەتى تۋرالى اقپارات تۇركيالىقتاردىڭ ءوزىن تاڭ قالدىردى. ويتكەنى، تۇرىكتەر ايگىلى فاتيح سۇلتان مەحمەت تۋرالى «Fetih-1453» فيلمىن 17 ميلليون دوللارعا تۇسىرگەن بولاتىن. ال، قىتايدىڭ «قۇبىلاي حان» اتتى سەريالى 220 ميلليون دوللارعا تۇسىرىلگەن.

Kaznews.kaztrk.kz