قازاقستاندا مەملەكەتتىك جەر تەلىمدەرى ءباسساۋداعا شىعارىلادى

استانا. قازاقپارات - جاڭادان قابىلدانعان جەر كودەكسى بويىنشا ەندى قازاقستاندا مەملەكەتتىڭ قاراماعىنداعى اۋىل شارۋاشىلىق جەرلەرى ءباسساۋداعا شىعارۋ ارقىلى ساتىلاتىن بولادى.

بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ق ر ۇلتتىق ەكونوميكا ۆيتسە-ءمينيسترى قايىربەك وسكەنبايەۆ ءمالىم ەتتى.

ونىڭ ايتۋىنشا، جەر تەلىمدەرىنىڭ كاداسترلىق قۇنى وزگەرمەيدى.

«بارلىق جەر پايدالانۋشىلارعا ايتارىم، جەرلەردىڭ كاداسترلىق قۇنىن ق ر ۇكىمەتى بەكىتتى. ق ر قاراماعىنداعى بارلىق جەر تەلىمدەرىنىڭ كاداسترلىق قۇنى وزگەرمەيدى»، - دەپ اتاپ ءوتتى ول.

ەگەر جەر تەلىمى اۋكسيون بارىسىندا ساتىلماسا، كاداسترلىق قۇنى 50 پايىزعا دەيىن تومەندەتىلەدى. جاڭا زاڭ بويىنشا جالعا بەرىلگەن جەرلەردى ساتىپ الۋ ءۇشىن جەڭىلدىكتەر قاراستىرعان. بۇنىڭ الدىندا اۋىل شارۋاشىلىق جەرلەرىن جالعا الىپ كەلگەن كاسىپكەرلەر ەندى ونى 10 -جىلدىق مەرزىم ىشىندە كاداسترلىق قۇنىنان 50 پايىزعا از باعامەن ءبولىپ تولەۋ ارقىلى ساتىپ الا الادى.

ونىڭ ايتۋىنا قاراعاندا، قازىرگى ۋاقىتتا جەكە مەنشىكتىڭ پايدالانۋىندا جاتقان 98,6 ميلليون گەكتار جەر بار.

«ولاردىڭ جالپى كاداسترلىق قۇنى 1 تريلليون 200 ميلليارد تەڭگە. دەمەك، كاسىپكەرلەرگە 50 پايىزدىق جەڭىلدىكپەن 10 جىلعا بەرىلسە، ولاردىڭ قۇنى 500-600 ميلليارد تەڭگە شاماسىندا بولادى»، - دەيدى ۆيتسە- مينيستر.

ەسكە سالا كەتەيىك، 97,4 ميلليون گەكتار جەر نەمەسە %98,8 ى ۇزاق مەرزىمدى جالعا بەرىلگەن. سونىڭ تەك 1,2 پايىزى جەكە مەنشىكتە. سونىڭ كەسىرىنەن اۋىلشارۋاشىلىق جەرلەرى نارىقتىق اينالىمعا تۇسە الماي وتىر.

اۆتور: جاسۇلان جولدىبايەۆ