تاريحي «قازاق ەلى» فيلمى ناۋرىز ايىندا كورەرمەنگە جول تارتادى
فيلم XV عاسىردا قۋاتتى يمپەريا بولعان التىن وردانىڭ كۇيرەپ، بىرنەشە جەكە حاندىقتاردىڭ پايدا بولۋ كەزەڭىنەن باستالادى.
شىڭعىس حاننىڭ نەمەرەسى جوشىنىڭ ۇلكەن ۇلى وردا ەجەننىڭ ۇرپاقتارى - كەرەي مەن جانىبەكتىڭ قازاق دالاسىندا العاش حاندىق قۇرعان كەزى سۋرەتتەلەدى. «تاريحتى كوركەم تۋىندىدا كورسەتۋدىڭ وزىندىك قيىندىعى بار»، - دەيدى شىعارماشىلىق توپ.
رۇستەم ءابدىراش، «قازاق ەلى» فيلمىنىڭ رەجيسسەرى:
- سيۋجەتتىك جاعىنان كەلگەن كەزدە كۇردەلى وقيعالاردى، سوعىس، جورىقتاردى، كوشتى ساقتاپ قالۋعا تىرىستىق. مىناۋ - ماعولستانعا بەت تۇزەگەن كوش. كينونىڭ وسى جەردە ءتۇسىرىلۋىنىڭ دە زاڭدىلىعى بار. اينالا تاريحي قورعاندار، اتا- بابالارىمىزدىڭ قانى تامعان جوڭعار الاتاۋى مەن قازاق دالاسىنىڭ تۇيىسكەن جەرى.
فيلمدەگى باس كەيىپكەر كەرەيگە - قايرات كەمالوۆ، جانىبەك رولىنە ەركەبۇلان دايىروۆ ءتۇسىپ جاتىر.
قايرات كەمالوۆ، كەرەي حاننىڭ بەينەسىن سومداۋشى:
- كەرەي سۇلتاننىڭ وبرازى - مەن ويناپ جاتقان وتە جاۋاپتى ءرول. الماعايىپ زاماندا ەل بولا ما، جوق بورداي توزا ما دەپ تۇرعان وتە جاۋاپتى دۇنيەدە، بۇكىل حالىقتىڭ تاعدىرىن، بولاشاعىن، موينىنا ارقالاپ، سونىڭ جاۋاپكەرشىلىگىن ارقالاپ، وسىنداي قادامعا بارۋى باتىلدىق.
تاريحي تۋىندىدا سول زاماننىڭ كۋاسى بولعان اقىندار مەن جىراۋلار دا بار. «قايران دا مەنىڭ ەدىلىم» دەپ جىرلاعان قازتۋعاننىڭ اتاقتى ءانى فيلمنىڭ مۋزىكالىق ارقاۋىنا اينالعان. فيلم ءىلياس ەسەنبەرليننىڭ «كوشپەندىلەر» شىعارماسىنىڭ نەگىزىندە تۇسىرىلۋدە. سسەناريىن بەلگىلى قالامگەر، جازۋشى سماعۇل ەلۋباي جازعان. ماڭىزدى تاريحي ءداۋىردى سۋرەتتەۋگە 300 گە جۋىق اكتەر قاتىسۋدا. 10 سەريالى «قازاق ەلى» تاريحي فيلمى ناۋرىز ايىندا كورەرمەن نازارىنا ۇسىنىلماق.
www.24.kz
