ورالماندارعا ەڭ ءبىرىنشى كەزەكتە تۇرعىن ءۇي سالۋ ءۇشىن جەر تەلىمدەرىن بەرۋدى شەشۋ كەرەك - ق. ايتاحان ۇلى
دەپۋتاتتىڭ سوزىنە قاراعاندا، بۇگىن قابىلدانعان قۇجات قازاقستاننىڭ دەموگرافيالىق ۇدەرىستەرىن جاقسارتىپ، شەت ەلدەگى قانداستارىمىزدى اتامەكەنىنە ورالۋىنا بايلانىستى جەڭىلدىكتەردى قاراستىرادى.
«زاڭ جوباسىندا ورالماندارعا جەڭىلدىكتەرمەن قاتار، تۇتىنۋ كرەديتتەرى مەن تۇرعىن ءۇي قۇرىلىسىنا يپوتەكالىق قارىز الۋ قۇقىعى بەرىلەدى دەپ جازىلعان. بۇل وتە دۇرىس، تولىق قولداۋعا بولادى، ورالمانداردىڭ تۇراقتانۋىنا قولايلى جاعدايلار دا جاسايدى. الايدا، مەملەكەت تۇرعىن ءۇي سالۋعا يپوتەكالىق قارجى بەرەتىن بولسا، وندا ورالماندار ەڭ الدىمەن جەر الۋى كەرەك. مىنە، وسى تۇرعىدان العاندا ورالماندارعا جەر تەلىمدەرىن بەرۋ ماسەلەسى قارالماعان. ولارعا بەرىلمەيدى. سوندىقتان دا، ورالماندارعا ەڭ الدىمەن تۇرعىن ءۇي سالۋعا جەر تەلىمدەرىن بەرۋ كەرەك دەپ ەسەپتەيمىن. باسپانا سالۋعا جەر بەرىلمەسە، ول ءۇشىن يپوتەكا بەرۋدىڭ قاجەتى قانشا»، - دەدى قۋانىش ايتاحان ۇلى.
سونىمەن قاتار، سەناتور وڭتۇستىك وڭىرلەردە ورالماندار ءۇشىن جەر تەلىمدەرىن بەرۋ ماسەلەسى ءتىپتى وزەكتى ەكەنىن تىلگە تيەك ەتتى. «ءبىز تۇپكىلىكتى شەشەتىن ماسەلەنىڭ ءبىرى دە سول جەرگە، جەر تەلىمدەرىنە قاتىستى بولىپ تابىلادى. قازاقستاننىڭ ءبىر وڭىرىندە حالىق سانى كوپ، جەر جوق، ەكىنشى ءبىر بولىگىندە حالىق سانى دا از، جەر تەلىمدەرى دە يگەرىلمەي بوس جاتىر. وسىنى دۇرىس رەتتەۋ كەرەك»، - دەدى ول.
اۆتور: قانات مامەتقازى ۇلى
