اقۇشتاپ باقتىگەرەيەۆا: جالعىزباستىلىق - ۇلتتىق تاربيەنىڭ ازدىعى
بۇل - 90 -جىلدارداعى قيىندىقتىڭ جەمىسى. ونىڭ الدىندا «انانى قورعاۋ كەرەك» دەگەن جەلەۋمەن قازاق وتباسىن بۇزۋعا جاسالعان ساياسي جۇمىستاردىڭ سوڭى ايەلدەردىڭ جالعىزباستى اتانۋىنا الىپ كەلدى. ودان كەيىن، قىزدارىمىز تىرشىلىككە بەيىمدەلۋ جاعىنان قاتتى دامىپ كەتتى دە، جىگىتتەرىمىزدىڭ كەيبىر كوزقاراسى «ارتتا» قالىپ قويدى.
قوعامدا جىگىتتەردى قورعاۋ ماسەلەسى بۇرىنعىداي بولماي قالدى. ءۇيى-كۇيى جوق جىگىتتەر ۇيلەنبەۋگە سەبەپ ىزدەيدى. الىسقا بارماي-اق قويايىق، الماتى مەن استاناداعى قازاق جاستارىنىڭ، اسىرەسە، جاس جىگىتتەردىڭ كوبى جۇمىسسىز. وتباسىنىڭ ىدىراۋىن الەۋمەتتىك ماسەلەمەن سالىستىراتىندار دا كوبەيدى. ەگەر باياعى سوعىستان كەيىنگى جەتىمدەردى باققانىمىز سەكىلدى، جۇمىسسىزدار مەن الەۋمەتتىك جاعدايى تومەن وتباسىلارعا مەملەكەت قامقورلىعىنا السا، بۇل ستاتيستيكالىق دەرەكتەر وزگەرەر ەدى. جۇمىسسىزدىق پەن وقۋدان شەت قالعان قازاق جىگىتتەرىنىڭ ۇيلەنۋ ماسەلەسى - قوعامدى تولعاندىراتىن دۇنيە.
ولارعا تىم قۇرىعاندا، ارزان نەسيەمەن قولجەتىمدى جاتاقحانا سالىنسا، قۇبا-قۇپ بولار ەدى. قولجەتىمدى باسپاناعا ەكىنىڭ ءبىرىنىڭ قولى جەتە بەرمەيتىنى تاعى بار. مەنىڭ باقىلاۋىم بويىنشا، نەكەسىز تۋعان بالالارعا «انا ءۇيىن» سالماي، كەرىسىنشە، اناسى مەن بالاسىنىڭ بىرگە تۇرۋىنا مۇمكىندىك جاساپ، ءبىر بولمەلى جاتاقحانالار سالساق، وندا اكەسى دە وتباسىنا ورالار ەدى. «انا ءۇيى» دەپ جەلەۋلەتىپ ناسيحاتتاعانشا، انا بالاسىنان ايرىلمايتىنداي جاعدايلار جاساعانىمىز دۇرىس. سوندا بالا جەتىم بولماس ەدى. الەۋمەتتىك ماسەلەسى شەشىلسە، ايەل جالعىز بولماس ەدى.
جالعىز ايەل تراگەدياسى - بالانىڭ اناعا، انانىڭ بالاعا قۇرمەتىنىڭ جوعالۋىنا اكەلىپ وتىر. ءبىزدىڭ بويجەتكەن قىزدارعا قوعام تاربيەلەۋ شارالارىن ۇيىمداستىرماسا، بولمايدى. جالعىزباستى ايەل مەن جالعىزباستى اكەنىڭ كوبەيۋىنىڭ تاعى ءبىر سەبەبى - ۇلتتىق تاربيەنىڭ ازدىعى. ۇلتتىق تاربيە السىرەپ كەتتى. قازاق قىزىنىڭ ۇلتتىق تاربيەسى مەكتەپتەن باستاۋ الۋى قاجەت. وتاندى ءسۇيۋدىڭ، وشاقتى ساقتاۋدىڭ، انا بولۋدىڭ جاۋاپكەرشىلىگىن كوپ ايتپاساق، مەكتەپ كەزىندە قىزداردىڭ قۇلاعىنا قۇيماساق، ەرتەڭ ءوزىمىز ۇتىلامىز. مۇنداي ۇلتتىق تاربيەنى ناسيحاتتايتىن ساباقتار ءبىزدىڭ مەكتەپتەردە مۇلدەم جوق.
«ايقىن»
