قازاقستاندا وندىرىلگەن التىن ءوز ەلىمىزدىڭ زاۋىتتارىندا عانا وڭدەلەدى - ءا. يسەكەشيەۆ
ەسكە سالايىق، جيىندا پالاتا دەپۋتاتتارى «باعالى مەتالدار مەن اسىل تاستار تۋرالى» زاڭ جوباسىن ءبىرىنشى وقىلىمدا ماقۇلداعان بولاتىن.
«مەملەكەت باسشىسىنىڭ تاپسىرماسىنا سايكەس، بىرىنشىدەن، قازاقستاننىڭ التىنى تولىعىمەن ەلىمىزدىڭ اۋماعىنا وڭدەلۋى ءتيىس. ەكىنشىدەن، ەۋرازيالىق ەكونوميكالىق وداق اياسىندا وسى سالاداعى قاتىناستاردى ۇلتتىق زاڭنامامەن رەتتەۋ قاجەتتىگى تۋىنداپ وتىر. ويتكەنى بۇنداي زاڭنامالار رەسەي مەن بەلارۋس ەلدەرىندە بار، ياعني اتالعان ەلدەر التىندى تەك ءوز ەلدەرىندە عانا وڭدەيدى»، - دەدى مينيستر اسەت يسەكەشيەۆ.
ونىڭ ايتۋىنشا، قازاقستاندا وڭدەلمەگەن التىن شيكىزاتىن وڭدەيتىن ەكى زاۋىت بولسا، جاقىندا استانادا اففينيرلەنگەن التىن شىعاراتىن ءۇشىنشى جاڭا زاۋىت اشىلعان. وسىعان وراي، زاڭ جوباسىنداعى نورمالارمەن اتالعان ءۇش زاۋىتتى شيكىزاتپەن قامتۋ تولىق قاراستىرىلىپ وتىر.
«بۇل رەتتە ەلىمىزدەن التىن شيكىزاتى كەنىن شەتەلگە شىعارۋشى كاسىپورىندار ەڭ الدىمەن قازاقستاننىڭ ءۇش زاۋىتىنان التىندى وڭدەۋدەن باس تارتقانى تۋرالى انىقتاما ۇسىنۋى ءتيىس بولادى. ال ءۇش زاۋىتتىڭ تەحنولوگياسى دا، قۋاتى دا ەلىمىزدەگى كەننىڭ باسىم بولىگىن وڭدەۋگە جەتكىلىكتى. ەڭ باستىسى بۇل زاۋىتتار كەن تۇرىندە شەتەلگە كەتىپ جاتقان اسىل زاتتاردى شەكتەۋگە دە سەپتىگىن تيگىزبەك. ويتكەنى، شيكى التىندى وڭدەۋ ءۇشىن شەتەلگە اكەتىلىپ جاتقان كەننىڭ اراسىندا اسىل زاتتار دا بىرگە اكەتىلەتىن، ەندى بۇلاي بولمايدى»، - دەدى مينيستر.
بۇل رەتتە ۆەدومستۆو باسشىسى ەگەر قازاقستاندىق ءۇش زاۋىت اسا سيرەك كەزدەسەتىن اسىل زاتتاردى وڭدەي المايتىن جاعدايدا بولسا، وندا كاسىپورىن ونى شەتەلگە شىعارماس بۇرىن ەڭ الدىمەن ۇلتتىق بانككە ۇسىنۋى تيىستىگىن جەتكىزدى.
«ارينە، ەكونوميكالىق تۇرعىدان بۇل تەتىك اسا ءتيىمدى. ەلىمىزدە التىن وڭدەيتىن ءۇش زاۋىت بار. ەڭ باستىسى، ەلىمىزدەگى التىننىڭ تولىق وڭدەلۋى قازاقستاندا جۇزەگە اساتىن بولادى»، - دەدى ءا. يسەكەشيەۆ.
اۆتور: قانات مامەتقازى ۇلى
