استانادا العاش رەت وتاندىق ەلەكتروموبيلدەردىڭ تۇساۋى كەسىلدى

استانا. قازاقپارات - ق ر ۇكىمەتى اپپاراتى ەلىمىزدە قۇراستىرىلعان العاشقى ەلەكتروموبيلدى تەكسەرىستەردەن وتكىزىپ جاتىر.

قۇراستىرۋدان وتكەن وسكەمەندىك KIA Soul EV ميكروۆەنى العاشقى ۇلگى رەتىندە تانىستىرىلدى، دەپ حابارلايدى BNews.kz.

العاشقى وتاندىق KIA Soul EV ەلەكتروموبيلى ق ر ۇكىمەتى وكىمىنە ءتۇستى. «ازيا اۆتو» زاۋىتىندا دايىندالعان بۇل اۆتوكولىك ءبىر اي بويى تەكسەرىستەر مەن باقىلاۋدان وتپەك. 2014-جىلدىڭ جەلتوقسان ايىندا ەلەكتروموبيلدىڭ العاشقى توبى وسكەمەندىك زاۋىتتان قۇراستىرىلىپ شىقتى.

«ازيا اۆتو» ا ق باسپا ءسوز قىزمەتىنىڭ مالىمدەۋى بويىنشا، ميكروۆەن Soul EV كولىك ۇلگىسىن 2014-جىلى «KIA Motors» كومپانياسى ۇسىنعان بولاتىن. سول كەزدەن باستاپ نورۆەگيا، كورەيا، گەرمانيا جانە ا ق ش ەلدەرىنىڭ اراسىندا بۇل ۇلگى ۇزدىك ساتىلىم قاتارىنا ىلىگىپ تە ۇلگەردى.

2015-جىلدىڭ قاڭتار-اقپان ايلارى ارالىعىندا وتكەن تەكسەرىس ناتيجەسىندە KIA Soul EV ەلەكتروموبيلى قىسقا ساقاداي ساي ەكەنىن 25 گرادۋس سۋىقتا دا دالەلدەپ شىقتى.

قازاقستاندا ءبىر جىل كولەمىندە عانا ەكولوگيالىق ترانسپورت سانى ەكى ەسە ۇلكەيگەنىن اتاپ وتكىمىز كەلەدى. بۇگىنگى تاڭدا ەلىمىزدە 200 ەلەكتروموبيل ىسكە قوسىلماق. ارينە بۇل ۇلكەن كولەم ەمەس. دەگەنمەن الداعى ۋاقىتتا بۇل سان دا بىرنەشە مارتە ەسەلەنەدى دەپ سەنەمىز. ەكسپو-2017 الاڭى اتاعىنا يە قازاقستان الداعى ۋاقىتتا بۇل سالادا ۇلكەن جەتىستىكتەرگە جەتەرى ءسوزسىز.