وڭتۇستىك قازاقستان وبلىسىندا ۇلتتىق ەتنو-تاريحي كەشەنى اشىلدى - فوتو
بۇل تۋرالى ق ر مادەنيەت جانە سپورت مينيسترلىگىنىڭ باسپا ءسوز قىزمەتىنەن حابارلادى.
سالتاناتتى اشۋ راسىمىنە تانىمال مادەنيەت، ونەر قايراتكەرلەرى، عالىم، تاريحشىلار، قوعامدىق بىرلەستىكتەر وكىلدەرى مەن ايماق جاستارى قاتىستى.
شارانىڭ الدىندا وبلىستىق تاريحي- ولكەتانۋ مۇراجايىندا قازاق حاندىعىنىڭ 550 جىلدىعى مونۋمەنتىنە دەيىن قولونەر، قىلقالام شەبەرلەرىنىڭ كورمەسى ءوتتى.
جاڭا كەشەننىڭ اۋدانى 75 گەكتار جەردى قۇرايدى. كەشەنگە «بايدىبەك ءبي» ەسكەرتكىشى، «ناۋرىز» الاڭى، وبلىستىق تاريحي- ولكەتانۋ مۇراجايى، ادەت- عۇرىپ جانە سالت- ءداستۇر ورتالىعى، يپپودروم ءبىرىڭعاي ساۋلەت انسامبلىنە بىرىكتىرىلدى. ەتنوساياباقتا ايماقتىڭ تاريحي- مادەني ەسكەرتكىشتەرىنىڭ 27 ماكەتىنەن تۇراتىن ەتنو-تاريحي ساياباق جانە تاريحي قۇندىلىقتار ورناتىلعان، ال ورتالىقتا ديامەترى 21 مەتر بولاتىن ءتۇرلى ءتۇستى سۋبۇرقاق قويىلعان.
ەتنو-تاريحي كەشەندە قازاق حاندىعىنىڭ 550 جىلدىعىنىڭ مونۋمەنتى ورناتىلعان. ەسكەرتكىشتىڭ بيىكتىگى 15 مەتردى قۇرايدى، ول قازاق ۇلتتىق ويۋلارى سالىنعان ورىلگەن ەكى اركادان تۇرادى. ەسكەرتكىشتىڭ ورتاسىندا بيىكتىگى 10 مەتر، ەنى 8 مەتردى قۇراعان پيراميدالىق كومپوزيتسيا ورناتىلدى. پيراميدانىڭ شەتىندە قازاق حاندىعىنىڭ بارەلەفتىك كومپوزيتسياسى مەن «قازاق حاندىعىنا 550 جىل» جانە ەلباسى ن. نازاربايەۆتىڭ «قازاق حاندىعىنىڭ 550 جىلدىعى بۇل ۇلتتىق تاريحتى ۇلىقتاۋ مەن بۇگىنگى جەتىستىكتەردى لايىقتى باعالاۋ» دەگەن ءسوزى ويىلىپ جازىلعان.
«جايلاۋ» كولىنىڭ جاعالاۋىنداعى ەسكەرتكىشتىڭ قاسىندا قازاق اۋىلى ورىن تەپكەن. جاعالاۋداعى دەمالىس ايماعىنىڭ اۋماعى 15 گەكتاردى قۇرايدى. مۇندا 4 روتوندا ورناتىلىپ، قايىق ستانساسى، كولىك تۇراعى جابدىقتالعان. بۇل ەتنو-تاريحي كەشەن قالا تۇرعىندارى مەن قوناقتارىنىڭ سۇيىكتى دەمالىس ورنىنا اينالادى.
