قازاقستاننىڭ اۆتونارىعى ەسكىرگەن اۆتوكولىكتەردەن قورعالاتىن بولادى - ا. راۋ
بۇل تۋرالى بۇگىن سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىندا ينۆەستيتسيالار جانە دامۋ ۆيتسە- ءمينيسترى البەرت راۋ ءمالىم ەتتى.
ەسكە سالا كەتەيىك، كوميتەت وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە يندۋستريالىق- يننوۆاتسيالىق ساياسات ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانعان بولاتىن.
اتالعان قۇجات ەلباسىنىڭ «100 ناقتى قادام» ۇلت جوسپارىن ىسكە اسىرۋعا باعىتتالعان.
«زاڭ جوباسىنداعى تاعى ءبىر تىڭ جاڭالىق - اۆتونارىقتى ەسكىرگەن، قولدانىلعان اۆتوكولىكتەردەن قورعاۋ شارالارىن قامتۋ. قازىرگى ۋاقىتتا قولدانىستاعى نورماعا سايكەس، ەسكىرگەن اۆتوكولىكتەردى اكەلۋدىڭ كەدەندىك باج سالىعى 35 پايىزدى قۇرايدى، بۇدان بولەك، كولىكتىڭ قوزعالتقىشىنىڭ ءاربىر تەكشە سانتيمەترىنە 2-4 ەۋرو شاماسىندا الىم الىنادى. ال ءبىز د س ۇ- عا كىرگەندە بۇل كەدەندىك باج 19 پايىزعا دەيىن تومەندەتىلىپ، الگىندەي الىم جيناۋ تۇگەلىمەن الىنىپ تاستالادى. سوندىقتان دا، ءبىزدىڭ مينيسترلىك وتەماقىلىق شارالار رەتىندە اۆتوكولىكتەردىڭ ءبىرىنشى تىركەلىمى بارىسىندا ءبىر رەتكى مەملەكەتتىك الىم ەنگىزۋدى ۇسىنىپ وتىر. بۇل دسۇ اياسىنداعى رۇقسات ەتىلگەن شارا بولىپ تابىلادى»، - دەيدى ۆيتسە- مينيستر. ونىڭ پايىمداۋىنشا، اتالعان نورما ەنگىزىلسە اۆتوكولىكتەر يەلەرى ءۇشىن جالپى شىعىستار سوماسى ارتىپ كەتپەيدى، ەسەسىنە مەملەكەتتىك بيۋدجەتكە ءتۇسىم جىلىنا 8 ميلليارد تەڭگەگە دەيىن ارتۋى ىقتيمال.
«ايتا كەتەرلىگى، بۇگىنگى تاڭدا قولدانىستاعى جوعارىدا كورسەتىلگەن ەلگە اكەلىنگەن كولىكتەرگە سالىناتىن سالىق ە ا ە و مۇشە- مەملەكەتتەر اراسىندا بولىنىسكە تۇسسە، ال ءبىز ەنگىزگەلى وتىرعان مەملەكەتتىك بىررەتكى الىم قازاقستاننىڭ بيۋدجەتىندە تۇتاستاي قالاتىن بولادى»، - دەيدى ا. راۋ.
توقتالا كەتەتىن جايت، زاڭ جوباسى اياسىندا ءبىرقاتار جاڭالىقتار قامتىلىپ وتىر. ماسەلەن، يننوۆاتسيالىق كلاستەر سالاسىندا عىلىمدى قاجەت ەتەتىن ەكونوميكانى قالىپتاستىرۋ ءۇشىن ەكى يننوۆاتسيالىق كلاستەر جۇزەگە اسپاق. ونىڭ ءبىرى، استانادا نازاربايەۆ ۋنيۆەرسيتەتى بازاسىندا قۇرىلادى. وندا عىلىمي زەرتتەۋلەر جاساۋ جانە ونى سوڭىنان كوممەرتسيالاندىرۋ ءۇشىن عىلىمي ورتالىقتار، زەرتحانالار ورنالاسادى.
ەكىنشىسى، الماتى قالاسىندا وڭىردەگى جوعارى وقۋ ورىندارى مەن ۇلتتىق ورتالىقتاردىڭ عىلىمي- شىعارماشىلىق الەۋەتىن پايدالانۋ ءۇشىن قۇرىلادى. الماتىداعى يننوۆاتسيالىق كلاستەر الدىنا ءىرى شەتەلدىك جوعارى تەحنولوگيالىق كومپانيالار مەن جەرگىلىكتى كومپانيالاردى تارتا وتىرىپ، جوبالاردى جۇزەگە اسىرۋ مىندەتى قويىلعان. بۇل ءۇشىن يننوۆاتسيالىق تەحنولوگيالار پاركىنە بىرلەسكەن كاسىپورىندار قۇرۋ ءۇشىن باسقارۋشى ورگاننىڭ وكىلەتتىگىن كەڭەيتۋ ۇسىنىلادى.
سەنات كوميتەتى زاڭ جوباسىن الداعى ۋاقىتتا وتەتىن پالاتانىڭ جالپى وتىرىسىنا شىعارۋ تۋرالى شەشىم قابىلدادى.
اۆتور: قانات مامەتقازى ۇلى
