پۋتيننىڭ جاپونياعا ساپارى كەيىنگە قالدى
وسى اپتادا قازاقستاندا ىسساپارمەن بولعان رەسەي پرەزيدەنتى ۆلديمير پۋتين ت م د ەلدەرى باسشىلارىنىڭ وتىرىسىندا حالىقارالىق تەرروريزم تاقىرىبىن قوزعادى.
ول سيريا داعدارىسىنا قاتىستى «ديالوگ جۇرگىزۋدەن باس تارتقانى ءۇشىن» ا ق ش- تى سىناپ، اسكەري ىنتىماقتاستىق تۋرالى كەلىسىم ت م د ەلدەرىنىڭ «يسلام مەملەكەتى» ۇيىمى سودىرلارىنىڭ اۋعانستان جاقتان ورتالىق ازياعا كىرۋىنە قارسى ءىس- قيمىلىن ۇيلەستىرۋگە مۇمكىندىك بەرەدى دەپ مالىمدەگەن.
ۇلى بريتانيانىڭ Guardian گازەتى ۆلاديمير پۋتيننىڭ 2015 - جىلدىڭ اياعىنا جوسپارلانعان جاپونياعا ساپارى تۋرالى جازعان. «توكيو باياعىدان سوزىلىپ كەلە جاتقان جەر داۋىنا (كۋريل ارالدارى) قاتىستى ماسكەۋدىڭ ۇستانىمىنا نارازى بولعاندىقتان ءارى رەسەيدىڭ سيريا داعدارىسىنا ارالاسقانىنا الاڭداۋشىلىعىنا بايلانىستى ۆلاديمير پۋتيننىڭ جوسپارلانىپ قويعان ساپارى بەلگىسىز ۋاقىتقا كەيىنگە قالۋى مۇمكىن» دەپ جازادى باسىلىم.
بىلتىر ناۋرىزدا قىرىمدى اننەكسيالاعانى ءۇشىن رەسەيدى قۇرامىنان شىعارىپ تاستاعان سوڭ، ۆلاديمير پۋتين كەلەسى جىلى «ۇلكەن جەتىلىك» سامميتىنە بارمايدى. ءبىراق، رەسمي تۇلعالاردىڭ حابارلاۋىنشا، توكيو بىلتىر پەكيندەگى APEC ءسامميتى كەزىندە كەلىسىلگەن بيىلعى ساپارىنا قاتىستى جوسپاردى ءالى دە قاراۋى مۇمكىن.
Guardian گازەتىنىڭ جازۋىنشا، جاپونيا ءتورت ارالدى تولىق قايتارۋدى تالاپ ەتەدى، ال 1956 - جىلعى كەلىسىمگە سىلتەيتىن رەسەي شاعىن ءارى ناشار دامىعان ەكى ارالدى عانا جانە ولاردى بەيبىت بىتىمگە قول قويىلعاننان كەيىن عانا قايتاراتىنىن مالىمدەگەن سوڭ، ەكى ەلدىڭ اراسىنداعى جەر داۋىنا قاتىستى كەلىسسوز تۇيىققا تىرەلگەن.
ۇلى بريتانيانىڭ Financial Times باسىلىمىندا رەسەيلىك مۇسىلمانداردىڭ رەسەيدىڭ سيرياداعى سوعىس قيمىلدارىنا قاتىستى كوزقاراسىن جازادى. گازەتتە «رەسەي مۇسىلماندارى ازىرشە كوشەگە شىققان جوق [نارازىلىق ءبىلدىرۋ ءۇشىن] جانە اشىق نارازىلىق ءبىلدىرۋ سيرەك قۇبىلىسقا اينالعان ەلدە ولاردىڭ كوشەگە شىعۋى ەكىتالاي. ءبىراق ساراپشىلار ناۋقان ۇزاققا سوزىلعان جاعدايدا زارداپتارى قانداي بولاتىنىنا الاڭدايدى» دەپ جازادى گازەت. ماقالادا ماسكەۋلىك Carnegie Centre ورتالىعىنىڭ كاۆكاز ماسەلەلەرى جونىندەگى ساراپشىسى الەكسەي مالاشەنكونىڭ «كەرى تيۋ قاۋپى بار» دەگەن پىكىرىن كەلتىرگەن.
رەسەي حالقىنىڭ 11 پايىزعا جۋىعى - 16,5 ميلليون ادام - مۇسىلمان، ەلدە كاۆكاز بەن ورتالىق ازيادان كەلگەن ءتورت ميلليونعا جۋىق ميگرانت تۇرادى. قازىر مۇسىلمان جەتەكشىلەرى كرەملدىڭ سيرياداعى ءىس- قيمىلىن قولدايتىنىن ايتادى. رەسەي ءمۇفتيات ءتوراعاسىنىڭ ورىنباسارى رۋشان اببياسوۆ «جاعدايدى ساياسيلاندىرماي، حالىقارالىق تەرروريزممەن كۇرەسىپ جاتقان پرەزيدەنتتى قولداۋعا» شاقىرعان.
«ءبىراق رەسەيدىڭ ارەكەتىن بۇلاي قورعاشتاۋ تەپە- تەڭدىكتى ساقتاۋ اكتىسى بولىپ سانالادى. [«يسلام مەملەكەتى» كوزىن جويۋى ءتيىس بولعان] ماسكەۋ ۇشاقتارى سودىرلار از شوعىرلانعان نەمەسە مۇلدە جوق جەرلەردى بومبىلاپ، ا ق ش جانە پارسى شىعاناعى ەلدەرى قولدايتىن كوتەرىلىسشىلەرگە سوققى بەرىپ جاتىر. پۋتين مىرزا سيرياداعى گامبيتىن رەسەيدىڭ راديكال كوزقاراستاعى مۇسىلماندارى اراسىندا ي م- گە ىقىلاس ءوسىپ كەلە جاتقان تۇستا باستادى. رەسەي سىرتقى ىستەر مينيسترلىگى سيريادا جيحادشىلار اراسىندا 2400 دەي ورىسشا سويلەيتىن ادام ءجۇر دەپ بولجايدى» دەپ جازادى Financial Times گازەتى.
ساراپشىلاردىڭ پىكىرىنشە، رەسەي مۇسىلماندارىنىڭ ىشىندەگى ي م جاقتاستارى اسىرەسە ماسكەۋدىڭ سيرياداعى داعدارىسقا ارالاسقانىنا نارازى. ءبىراق جيحادشىلارعا ەش قاتىسى جوقتاردىڭ وزدەرى الاڭداي باستاعان. كەيبىرەۋلەردى شەشەن سوعىسى سياقتى رەسەيدىڭ بۇعان دەيىن مۇسىلمان الەمىندە جۇرگىزگەن اسكەري وپەراتسيالارىنان بەرى ۇمتىلماعان جايتتار الاڭداتادى.
«ازاتتىق»
