اتىراۋدا نۇرلان بالعىمبايەۆتى سوڭعى ساپارعا شىعارىپ سالدى
قوشتاسۋ شاراسىندا ق ر پرەمەر- ءمينيسترى كارىم ءماسىموۆ قازاقستان پرەزيدەنتى نۇرسۇلتان نازاربايەۆتىڭ كوڭىل ايتۋ حاتىن وقىدى.
دينا نۇرپەيىسوۆا اتىنداعى مادەنيەت ۇيىندە وتكەن قوشتاسۋ شاراسىنا مىڭنان استام ادام قاتىستى. نۇرلان بالعىمبايەۆتى سوڭعى ساپارعا شىعارىپ سالۋعا ۇكىمەت مۇشەلەرى، سەناتورلار، پارلامەنت دەپۋتاتتارى، مۇناي- گاز كومپانيالارىنىڭ باسشىلارى، قوعام وكىلدەرى، ارداگەرلەر كەلدى.
بۇرىنعى ق ر پرەمەر- ءمينيسترى نۇرلان بالعىمبايەۆ 68 گە قاراعان شاعىندا اتىراۋ قالاسىندا 14 - قازاندا دۇنيەدەن ءوتتى.
بالعىمبايەۆ نۇرلان وتەپ ۇلى 1947 - جىلى اتىراۋ قالاسىندا تۋعان.1973 - جىلى قازاق پوليتەحنيكالىق ينستيتۋتىنىڭ مۇناي جانە گاز فاكۋلتەتىن تاۋ- كەن ينجەنەرى ماماندىعى بويىنشا ءبىتىردى.
1992-1993 -جىلدارى ماسساچۋسەتس ۋنيۆەرسيتەتىنىڭ تىڭداۋشىسى بولدى.
ەڭبەك جولىن اتىراۋ (قازىرگى ماڭعىستاۋ) وبلىسىنىڭ قۇرىق كەنتىندە بۇرعىلاۋشىنىڭ كومەكشىسى (1964) بولىپ باستاعان.
1973-1977 -جىلدارى «ماڭعىشلاق مۇناي» بىرلەستىگىندە جەراستى جوندەۋ وپەراتورى، مۇناي شىعارۋ جونىندەگى وپەراتور، سكۆاجينالاردى جەراستى جوندەۋ شەبەرى.
1977 - 1992 - جىلدارى اتىراۋ وبلىسىنداعى اققىستاۋ وندىرىستىك قىزمەت كورسەتۋ بازاسى باستىعىنىڭ ورىنباسارى، «ەمبى مۇناي»، «اقتوبە مۇناي» بىرلەستىكتەرىنىڭ باس ينجەنەرى، ك س ر و مۇناي جانە گاز ونەركاسىبى مينيسترىگىنىڭ باس باسقارمالارىندا باستىقتىڭ ورىنباسارى قىزمەتتەرىن اتقاردى. ودان كەيىن ا ق ش- تىڭ ماسساچۋسسەتس ۋنيۆەرسيتەتىندە وقىپ، مۇناي ءوندىرىسىنىڭ الەمدىك وزىق تاجىريبەلەرىن ءىس جۇزىندە مەڭگەرۋ ءۇشىن «شيەۆرون» كومپانياسىندا جۇمىس ىستەدى.
1994-1997 - جىلدارى ق ر مۇناي جانە گاز ونەركاسىبى ءمينيسترى، «قازاق ويل» ۇلتتىق مۇناي- گاز كومپانياسىنىڭ پرەزيدەنتى بولدى.
1997 - 1999 - جىلدارى قازاقستان رەسپۋبليكاسى پرەمەر- ءمينيسترى رەتىندە قىزمەتىن اتقاردى.
1999 -جىلدان «قازاق ويل» ۇلتتىق مۇناي كومپانياسىنىڭ پرەزيدەنتى، قازاقستان ۇكىمەتىنىڭ مۇشەسى.
2002 - جىلدان - «قازاقستاندىق مۇناي ينۆەستيتسيالىق كومپانياسى» ا ق پرەزيدەنتى.
2007 -جىلدان - ق ر پرەزيدەنتىنىڭ كەڭەسشىسى، كاسپي تەڭىزى رەسۋرستارىن پايدالانۋ ماسەلەلەرى جونىندەگى قازاقستاننىڭ ارنايى وكىلى.
2009 - جىلدىڭ جەلتوقسانىنان بەرى - «قاز مۇناي گاز» سالىنىپ جاتقان كاسىپورىندارىنىڭ اكىمشىلىگى» ج ش س باس ديرەكتورى قىزمەتىن اتقاردى.
بالعىمبايەۆ - ەلىمىزدىڭ مۇناي جانە گاز ونەركاسىبىن زامان تالابىنا ساي دامىتىپ، قازبا بايلىقتاردى تيىمدىلىكپەن يگەرىپ، حالىق يگىلىگىنە جاراتۋ جونىندەگى ءىرى جوبالاردى جاساۋ ىسىنە تىكەلەي ارالاسىپ، ۇيىتقى بولعان تۇلعا. ۇكىمەت باسشىسى رەتىندە الەۋمەتتىك سالاداعى رەفورماتورلىعىمەن، وتاندىق تاۋار وندىرۋشىلەرگە مۇمكىندىگىنشە قولداۋ كورسەتۋ باعىتىن ۇستانۋىمەن ەرەكشەلەندى. 1- دارەجەلى «بارىس» وردەنىمەن ماراپاتتالعان (1999).
