قازاق حالقىنىڭ قوناقجايلىلىعىنا ءتانتى بولعانىم سونداي، ءوزىمدى ۇيگە كەلگەندەي سەزىندىم - جوۋتو شىڭ، كەرۋەنباسى
كەشە الماتىدا «قازاقپارات» تىلشىسىنە بەرگەن سۇحباتىندا «قىتاي-قازاقستان» دوستىق جانە ىنتىماقتاستىق كەرۋەنىنىڭ باسشىسى جوۋتو شىڭ وسىلاي دەدى.
«قىتاي-قازاقستان» دوستىق جانە ىنتىماقتاستىق كەرۋەنى قىتايدىڭ شانچي پروۆينتسياسىنىڭ چيان قالاسىنان بىلتىر 19- قىركۇيەكتە شىققان ەدى. ءبىز جولدا شولەيتتى جەرلەرمەن دە، قارلى تاۋ اسۋلارىنان دا، جولمەن دە جولسىزبەن دە ءجۇرىپ وتتىك. ارينە، شارشادىق. ال قازاقستان شەكاراسىن بيىل 2- قىركۇيەكتە باسىپ وتتىك. سودان بەرى 400 شاقىرىمنان استام جەر ارتتا قالدى. قاي قالا، قاي اۋىلدىڭ ماڭىنا كەلىپ توقتامايىق، جەرگىلىكتى حالىق ءبىزدى قۇشاق جايىپ قارسى الىپ جاتتى. مەن قازاق حالقىنىڭ قوناقجايلىلىعىنا ءتانتى بولعانىم سونداي، ءوزىمدى ۇيگە كەلگەندەي سەزىندىم»، - دەدى كەرۋەنباسى.
سونىمەن قاتار، ول كەرۋەننىڭ قازاقستاندىقتارعا شاي الىپ كەلە جاتقاندىعىن جەتكىزدى.
«ءبىزدىڭ كەرۋەندە 136 قوس وركەشتى تۇيە مەن ارباعا جەگىلگەن 8 ات بار. بارلىعى 80 نەن استام ادام كەرۋەندى الىپ كەلە جاتىر. ولاردىڭ ىشىندە كەرۋەنشىلەر، مال دارىگەرلەرى، اسپازدار، ءتىلماشتار، شاي دايىنداۋشى شەبەرلەر، جۇكشىلەر تاعى باسقا دا ادامدار بار. ءبىزدىڭ تۇيەلەرىمىز بەن ات اربالارعا ىشىنە كىرپىش شاي سالىنعان اعاش ساندىقتار ارتىلعان. بۇل - شانشي ولكەسىندە 1368-جىلى اشىلعان «ي جە فۋ» دەپ اتالاتىن قارا شاي. نەگە وسى شايدى الىپ كەلە جاتىرمىز؟ ويتكەنى شاي - كونە زاماندا ۇلى جىبەك جولى ارقىلى تاسىلاتىن ماڭىزدى تاۋارلاردىڭ ءبىرى بولعان. ونىڭ ۇستىنە قازاق حالقى ەتتى، مايلى تاماقتا كوبىرەك تۇتىناتىن حالىق قوي. ءبىز سوندىقتان وسى دياندىق «ي جە فۋ» شايىن الىپ كەلە جاتىرمىز. ونى ايالداعان جەرلەرىمىزدە جەرگىلىكتى تۇرعىندارعا سىيعا تارتىپ جاتىرمىز. جانە دايارلاۋ ءادىسىن ۇيرەتەمىز. بۇل - ەمدىك شاي. ول ادامنىڭ قان قىسىمىن، قانت كولەمىن ازايتادى، اس قورىتۋ جۇيەسىن رەتكە كەلتىرەدى جانە ارتىق سالماقتى جويادى»، - دەدى جوۋتو شىڭ.
ايتا كەتەلىك، كەرۋەن كۇنىنە 25 شاقىرىمان ءجۇرىپ وتىرادى. ونىڭ سوڭعى ايالداماسى - تاراز قالاسى. جوسپار بويىنشا كەرۋەن جامبىل وبلىسىنىڭ ورتالىعىنا الداعى 7- قازانعا دەيىن بارىپ جەتۋى ءتيىس.
اۆتور: جاپپاربەرگەن ايبوتا
