الماتىدا تۇڭعىش رەت دۇنيەجۇزىلىك شاي قۇرىلتايى ءوتتى
وعان الماتى قالاسى اكىمدىگى مەن قازاقستان حالقى اسسامبلەياسىنىڭ وكىلدەرى، قىتاي حالىق رەسپۋبليكاسىنىڭ الماتىداعى باس كونسۋلى چجان ۆەي، شاي وندىرىسىمەن اينالىساتىن قىتايلىق جانە وتاندىق كومپانيالاردىڭ وكىلدەرى قاتىستى.
«بۇل شاي قۇرىلتايى قازاقستاندا تۇڭعىش رەت وتكىزىلىپ وتىر. ونداعى ماقسات - شاي وندىرىسىنە قاتىستى قازاقستان مەن قىتاي اراسىنداعى ساۋدا بايلانىسىن نىعايتۋ جانە شاي ءوندىرىسى مەن ساۋداسىنا بايلانىستى باسقا دا ماڭىزدى ماسەلەلەردى تالقىلاۋ.
بۇل قۇرىلتاي تۇڭعىش رەت ۇيىمداستىرىلىپ وتىرعاندىقتان وعان بار بولعانى 70 كە جۋىق ادام قاتىستى. ءبىز بولاشاقتا بۇل قۇرىلتايدى قازاقستاندا ءداستۇرلى تۇردە جىل سايىن وتكىزىپ وتىرۋدى جوسپارلاپ وتىرمىز. وعان باسقا دا مەملەكەتتەردەن دەلەگاتتار قاتىساتىن بولادى»، - دەدى ءوز سوزىندە قازاقستان دۇنگەندەرى قاۋىمداستىعىنىڭ پرەزيدەنتى حۋسەي داۋروۆ.
ايتا كەتەلىك، قۇرىلتاي بارىسىندا قىتاي حالقىنىڭ عانا ەمەس، سونىمەن قاتار قازاق، قىرعىز وزبەك، تاجىك جانە قازاقستاندا ءومىر سۇرەتىن باسقا دا ەتنوستاردىڭ شاي ازىرلەۋ جانە شاي قۇيۋ داستۇرلەرى پاش ەتىلدى.
اۆتور: جاپپاربەرگەن ايبوتا
